كود سبور//

باغيين الوداد الرياضي يجيبو الدولي المغربي أمين حارث يلعب معهم فكاس العالم للاندية الصيف الجاي.

وكشفت مصادر جيدة الاطلاع، ان الوداد الرياضي داخلين فمفاوضات مع أولمبيك مارسيليا الفرنسي فريق أمين حارث، باش يخليوه يلعب معهم إعارة فمونديال الاندية فالميريكان، مع العلم ان امين حارث كان من نجوم مارسليا فالسنوات اللي فاتو ولكن تراجع مستواه بشكل كبير مدة هادي.

وكايحاول هشام ايت منا رئيس الوداد الرياضي يرقع شويا الفريق بشي صفقات باش يحفظ ماء وجهو مع الوداديين الغاضبين عليه بسبب التسيير الكارثي ديالو والوعود الكاذبة اللي عطى فأول الموسم اللي سالاه النادي بزيرو لقب.

ومن الصفقات المثيرة للجدل اللي دار ايت منا استعدادا لمونديال الاندية، التوقيع من نور الدين أمرابط مول 38 عام، ورجع حمزة الواسطي اللي أصلا الوداد صيفطو بحالو قبل سنوات مشى يلعب مع المحمدية ملي كان ايت منا رئيس لها ولعب حتى مع اتحاد طنجة.