كود سبور//

كشف الدولي الموريتاني بونا عمر خصم المنتخب المغربي المقبل فماتش ودي الثلاثاء الجاي، على كيفاش بدا كيلعب الكورة حتى وصل للوداد، اللي محترف فيه دابا وشكر الجمهور الودادي على التعامل الزوين معه والترحيب به.

وهضر بونا عمر اللي غيلعب مع موريتانيا ضد المنتخب المغربي فأكادير، وقال فحوار للموقع الرسمي ديال الاتحاد الموريتاني لكرة القدم: “بديت الكورة فالأحياء الشعبية فالملاح حي السعادة ومنها بديت نلعب فالقسم الثاني حتى وصلت لفريق نواذيبو”.

وكمل بونا عمر: “كأس إفريقيا فالكوت ديفوار كانت بالنسبة ليا أنا هي البوابة باش يعرفني بها العالم ويعرف بها العالم المنتخب الموريتاني، حيث الإنجاز اللي درنا تاريخي ولأول مرة المنتخب الموريتاني يتأهل للدور الثاني”.

وبخصوص كيفاش انتقل للوداد قال بونا عمر: “البداية ديالي مع الوداد عشتها وقبل ما نمشي للمغرب، حيث جمهور الوداد كانو كيقلبو عليا فأنستغرام باش يعرفوني وكيرحبو بيا فالوداد وفالعائلة وهذا الشي خلاني نتمنى نجي دغيا للوداد بسبب الظروف الزوينة والمعاملة الحسنة اللي شفتها على مواقع التواصل الاجتماعي وملي جيت للوداد رحبو بيا الوداديين فالماتشات وجمهورهم كبير”.

ووضح النجم الودادي: “كان ساهل عليا نتأنتيگرا فالبطولة المغربية حيث كنت يالاه جاي من المشتركة مع المنتخب الموريتاني فكوب دافريك وملي كتلعب كاس افريقيا كتسهال عليك اي بطولة، بالإضافة للمشاركات ديال مع نواذيبو فالمسابقات الإفريقية من قبل”.

وأكد بونا عمر: “طموحي مع المنتخب الموريتاني نتأهلو لكاس العالم حيث جيرانا كاملين شعوبهم يفرحو بالتأهل للمونديال وانا نبغي الجمهور الموريتاني يفرح فرحة اخرى”.