كود سبور//

فالوقت اللي كانو الوداديين كايحلمو بالتعاقد مع كريستيانو رونالدو، او على الاقل يجيب لهم هشام ايت منا لاعب باسم معروف يعطي اضافة للفريق الأحمر المقبل على كاس العالم للاندية، كان عند ولد المحمدية رأي آخر.

هشام ايت منا كان عندو رأي مخالف وگاعما مسوق الوداديين والمطالب ديالهم بتدعيم صفوف الفريق بلاعبين فالمستوى الكبير، وناض رجع حمزة الواسطي اللاعب اللي مول 30 عام اللي فايت له كان فالوداد بلا اضافة قبل ما يمشي يلعب مع شباب المحمدية فاش كان شادها هشام ايت منا ويمشي يلعب مع اتحاد طنجة.

هشام ايت منا سنا مع حمزة الواسطي عقد لمدة 2 مواسم، وهذا الشي من المنتظر يجر عليه غضب الوداديين وسخطهم، خصوصا وان بحال هاد الصفقات راه ملي شد رئاسة الوداد الصيف الماضي وهو كايدير فيها والنتيجة هي الفريق خرج بموسم الصفري.