كود سبور//

حملت جماهير الوداد الرياضي، رئيس النادي هشام أيت منا مسؤولية المستوى الكارثي ديال الفريق الأحمر، والنتائج المتذبذبة اللي كايدوز منها هذا الموسم وآخرها الخسارة الكبيرة مع المغرب الفاسي، البارح السبت فتيران العربي الزاولي بنتيجة 4-1 ضمن الجولة 16 من البطولة الاحترافية.

واعتبرت جماهير الوداد الرياضي، أن رئيس النادي هشام أيت منا المسؤول الأول على الأداء الكارثي ديال الفريق، المقبل على خوض منافسات كأس العالم للأندية 2025، الصيف الجاي فالميريكان، وتسألت واش بهذا المستوى غايلعبو مع مانشستر سيتي النگليزي ويوفنتوس الإيطالي وحتى العين الإماراتي؟.

جماهير الوداد الرياضي، وجّهت أصابع النقد القاسي إلى رئيس النادي هشام آيت منا، وقالت إنه المسؤول الأول والأخير على التعاقد مع لاعبين أغلبهم ما عطاش الإضافة وماشي بمستوى الفريق الأحمر، ومن بينهم اللاعبين البرازيليين، وما جابش گول مزيان ينافس يوسف المطيع اللي تراجع مستواه وكايدير أخطاء كارثية، بالإضافة إلى لاعبين تعطاتهم الفرصة ديالهم فالوداد وما عطاوش بحال إسماعيل المترجي، من غير لاعبين وقع معهم فأول الموسم وما كايلعبوش.

ثقة الوداديين في رئيس النادي هشام أيت منا بدات كاتهرس، بالمستوى الكارثي والنتائج السلبية اللي كايحصد الفريق الأحمر، حيث مازال الواك ما قدر يستقر فالنتائج وحتى مؤشرات مطمئنة ما كايناش، خصوصا وأن أيت منا كان عليه إجماع الوداديين على أنه المنقذ للنادي من الأزمة ولكن وحتى لدابا مازال الفريق غارق فالنتائج السلبية، وحتى المدرب الجنوب إفريقي رولاني موكوينا، ولاو كايشوفو أنه ما كانش الاختيار المناسب للوداد.