كود سبور//

عيا جمهور الوداد الرياضي، من الصبر على رئيس النادي هشام ايت منا، بعدما فشل فالوعود الكثيرة اللي كان كايواعد بها الوداديين على أنه غايرجع الفريق لبلاصتو الحقيقية كيفما كان عليه الحال مع الرئيس الأسبق سعيد الناصيري.

جمهور الوداد الرياضي استغل ماتش الفريق ضد أولمبيك آسفي فتيران المسيرة الخضرا برسم الدورة 27 من البطولة، أمس الاربعاء 21 أبريل 2025، باش يعبر على الغضب ديالو من ايت منا، ويقولو له راك طلعتي فالراس، بعدما عطاوه مهلة موسم كامل وعلى گدو باش يصاوب فريق تنافسي، ولكن حتى حاجة من الهضرة اللي كان كايقول ما وفا بها، حيث الفريق خرج بزيرو لقب قبل نهاية الموسم بشهرين، وحتى المركز الثاني ما قدرش الواك يحققو حتى لدابا، والمركز الثالث اللي فيه راه يقدر يمشي له.

گروب “وينرز” المساند للوداد الرياضي، جا آيت منا من اللخر، وطلعو له ميساج المعنى ديالو واضح وباين، باش يمشي بحالو ويعطي التيساع للوداد وقالو له: “ماشي منا اللي كايحقق لغيرنا شنو كيتمنى”، وهذا الميساج لقا تأييد كبير من الوداديين على المواقع التواصل الاجتماعي، اللي ستوعبو أن المشكل د الفريق راه فرئيس النادي، وماشي فقط تقني متعلق بالمدرب رولاني موكوينا، اللي ما بغاش يدير الندوة الصحافية ورا ما تعادل مع أولمبيك آسفي بواحد لواحد.

التسيير العشوائي ديال هشام آيت منا فالوداد الرياضي، دخل الفريق فالحيط، وبان أن ولد المحمدية كان الغرض ديالو هو التصاور والشهرة برئاسة الوداد، وماشي أنه يخدم النادي كيفما كان كايدعي ملي قدم راسو للوداديين على أنه المنقذ اللي عندو حلول المرحلة الصعبة اللي كان كايدوز منها الفريق الأحمر الموسم الماضي، ودابا الوداديين فهمو أنه ماشي الشخص المناسب لرئاسة الوداد وعمرو ما غايرجع الوداد كاتخلع كيفما كانت مع الرئيس الأسبق سعيد الناصيري، وخاصو يمشي بحالو.