كود سبور//

عبر عدد من مكونات الوداد الرياضي على دعمهم لهشام آيت منا المرشح لرئاسة النادي ضد المنافس ديالو سعد الله ياسين، وهذا الشي قبل 3 ايام من انعقاد الجمع العام الانتخابي للنادي اللي غايكون الأربعاء 24 يوليوز الجاري.

ودايرين الوداديين حملة على مواقع التواصل الاجتماعي عبرو من خلالها عدد من مكونات النادي على دعمهم لهشام آيت منا، ومن بينهم الكاتب العام السابق مهدي الزوات اللي خرج فالفيسبوك وقال بشكل علني أنه غايصوت على هشام أيت منا، وحتى الناطق الرسمي السابق للنادي محمد طلال واللي هو منخرط ودادي دابا، خرج فالفيسبوك وقال أنه يدعم هشام آيت منا ولائحتو.

وكايشوفو عدد من الوداديين أن هذا الشي اللي دار هشام آيت منا ملي تعين كرئيس منتدب لفرع وداد كرة القدم والتوقيع مع المدرب رولاني موكوينا شي حاجة إجابية ومؤشر على أنه إذا طلع رئيس للمكتب المديري غايساهم فتتويج النادي بالألقاب، كيفما كان فعهد الرئيس الأسبق سعيد الناصيري، وبالمقابل متخوفين من رئاسة سعد الله ياسين للنادي خصوصًا وأنه فالتصريحات ديالو ما عطاش شي مؤشرات إيجابية، واكتفى فقط بالقول أنه “مستعد يستثمر من جيبو ومن جيب الناس اللي معهم ومن الناس المحسنين وأنه ما داخل للترشح لرئاسة الوداد إلا ومستعد”.