گود سبور//

كان سعيد الناصيري الرئيس الأسبق للوداد الرياضي، بطل حفل استقبال النادي لمجسم كأس العالم للأندية 2025، أمس الثلاثاء فالدار البيضاء، واخا كان حاضر الرئيس الحالي هشام آيت منا وقال كلمة بالمناسبة، ولكن الناصيري كان بطل فعينين الحاضرين اللي من خلال المداخلات ديال عدد منهم كايبانو عارفين أن الناصيري ما غايتعاودش شي حد بحالو بسهولة فالوداد، وحتى الثقة فآيت منا بانت مهزوزة خصوصا بعد هذا الموسم الكارثي وهو أول موسم له فرئاسة النادي واللي خرج فيه الفريق معه بزيرو لقب، قبل گاع ما يسالي الموسم.

هشام آيت منا الرئيس الحالي للوداد الرياضي وخلال الكلمة ديالو فحفل استقبال مجسم كاس العالم 2025، ما قال حتى كلمة اعتراف أو شكر فحق سعيد الناصيري الرئيس الأسبق للوداد الرياضي، واللي بالفضل ديالو مشارك الفريق الأحمر فالبطولة بعدما كان ربح دوري أبطال إفريقيا فالعهد ديالو عام 2022.

ولكن الوداديين الحرار والحارين والحقيقيين واللي عارفين مزيان تاريخ الوداد وقيمة سعيد الناصيري، والإضافة اللي عطاها للنادي وكانت ورا تتويج الواك بعدد من الألقاب من بينها دوري أبطال إفريقيا 2017، و2022، جبدو سعيد الناصيري بكلمات معبرة واعترفو بالفضل ديالو على الواك، وشكروه.

والبداية بكلمة النجم السابق للوداد، فخر الدين رجحي الملقب بفريخ، اللي كان واحد من أبرز المنتقدين لسعيد الناصيري ملي كان رئيس الوداد الرياضي، واللي قال فالحفل أمام الحضور وقدام مجسم كأس العالم للأندية: “نتمنى الفرج لسعيد الناصيري، والوداد دابا فيد آيت منا ما عرفناه يهزها ولا يحطها وكان خاصنا نديو كأس العرش قبل ما نشوفو كأس العالم”، هذا الهضرة عندها دلالات كبيرة وقوية ورسائل فالعمق بأن سعيد الناصيري عندو الفضل فهذا الشي اللي وصل ليه الوداد والمشاركة فالمونديال ورئيس صعيب يتعاود فالنادي، وأن هشام آيت منا خاصو يخدم ماشي يركب على الموجة وعلى إنجازات المسيرين اللي سبقوه فالنادي.

عبد اللطيف نصير الكابيتان السابق للوداد الرياضي أيام سعيد الناصيري، حتى هو جبد البريزيدون الأسمراني، وقال عليه: “دوزت 7 المواسم مع الوداد الرياضي والناصري ما عمرو كان مخلي شي حاجة خاصانا، كان واقف على الكبيرة والصغيرة، كانزيد نشكرو وكانطلب من الناس الحاضرين يزيدو يصفقو عليه”.

محمد طلال الناطق الرسمي باسم الوداد الرياضي لسنوات، والمسؤول اللي ضرب مع الوداد الطريق فالسما والأرض تحت رئاسة سعيد الناصيري، حتى هو هضر على الرئيس الأسبق للنادي، وقال تصريح متورخ  كايبورش خلال حفل استقبال مجسم كأس العالم للأندية: “كاينين حاضرين وغائبين، الغائب الأكبر هو الأخ والصديق والأستاذ اللي خلاني اليوم نكون گالس هنا وداير هاد الكرافاط، وكانتشرف أنني نطلع لهذه المنصة هو سعيد الناصيري الله يفرجها عليه، راه عمرو ما خلانا نحسو أننا غرباء ونتمناو آيت منا يكون بحالو”.