كود هناء ابو علي كازا /////

مصطفى التراب الرئيس المدير العام للمكتب الشريف للفوسفاط من 2006 دار خدمة مزيانة من نهار وصل لهاد المنصب. رقم المعاملات ضاعفت بزاف ونجح وخلى المغرب يدخل فلوس كثيرة. هاد الشي ما عندنا ما يتقال. لكن كاين وجه كحل مظلم لتدبيرو للفوسفاط. دار بيه السياسة بمعنى رضى اقوياء المغرب. مثلا ما عندها معنى ان التراب قرر يدير فمدينة بنگرير جامعة السادس متعددة الاختصاصات التقنية. هاد الجامعة افتتحها سيدنا ف2017 ماشي بلاصتها هاد لمدينة. رادت بفلوس الفوسفاط، خاصها تدار فخريبكة او اسفي. ختارها التراب ضد كلشي غير حيث مدينة فؤاد عالي الهمة مستشار سيدنا. التراب تملق للهمة باش قرر يدير هاد الجامعة اللي مهمة بزاف للبلاد.

حتى باش قرر يبني ف3 سنين فرع لهاد الجامعة فالرباط باش يقرا فيها ولي العهد مولاي الحسن وكان واقف بيدو على كلشي، طلع كلية الحكامة والعلوم الاقتصادية والاجتماعية فوقت قياسي. كانت كشفات “تيل كيل” فعدد عندو كثر من عامين، باللي التراب جاب لاعب كرة سلة مشهور فدوري المتحرفين بامريكا غير حيث عزيز على ولي العهد وباللي فاللخر ما حضرش مولاي الحسن. بهاد الشي تعرفو جانب فشي شكل فشخصية التراب
هاد الرئيس المدير العام عندو اتفاقيات فيها لملايين مع عدد من الصحف والمواقع خاصة الفرنكفونية. هاد الاتفاقيات ماشي باش يدافعو على المكتب الشريف للفوسفاط، اللا، باش يدافعو على التراب. الشركة من حقها دير هاد الشراكات، اللي ماشي معقول هو ما عمرهم كشفو على شكون مستافد وبشحال.

التراب المهووس بصورتو مخدم معاه جيش فالتواصل، فيهم عدد كانو مدراء تحرير وصحافيين ما كيديرو والو والو. اكثر من هادي ما بقاوش يجيو للخدمة. كيديرو الخدمة عن بعد وهاد الشي بدا بعد “كورونا”.

تصورو كيخلص فلوس صحيحة وحدين خرجو على صحف ومجلات كانو خدامين فيها، غير حيث شكروه ومدحوه شي مرة او صاحب شي حد فعائلتهم. مازال مستمر فهاد السياسة

ممكن انتقاد هاد الرجل لانو مكلف بشركة ديال الدولة المغربية. اقتصاديا قدم ليها حوايج كثيرة. انتقادو ما خاصوش يكون من جهة كتقلب تاخذ بلاصتو او حيد ليهم مارشيات كبيرة، غير هو راه ماشي كلشي اللي كيديرو راه واعر وخاص كلشي يصفق عليه. ايلى بغى يكون شفاف خاصو يقنعنا علاش جامعة فبنگرير، كيفاش همش مدينة بحال خريبكة. اش كيدير بصحافيين وخبراء ما كيديرو والو وعايشين ملوك وفيهم سياسيين من اليسار وغيرو اللي تحولو عياشة وصافي

التراب ذكي ووطني ولكن خاصو ديما يتحاسب. راه كيتحول لامبراطور فشركة ديال لمغاربة