كود الرباط//

غابت وزارة الداخلية، عبر العامل د العرائش والوالي ديال جهة الشمال، عن افتتاح الموسم الفلاحي 2025-2026، للي عطا الانطلاقة ديالو وزير الفلاحة والصيد البحري والتنمية القروية والمياه والغابات، أحمد البواري، من جماعة أربعاء عياشة بدائرة مولاي عبد السلام بإقليم العرائش، الجمعة لي فاتت.

غياب العامل، فسرته مصادر “كود”، بلي الداخلية بدات تاخذ مسافة من جميع الوزراء المنتمين سياسيا، خصوصا وأن هاد العام هو آخر سنة ف عمر الحكومة للي كتعتبر سنة انتخابية بامتياز.

الحكومة، عبر رئيسها ووزراء الأحرار خصوصا، صرحوا بلي غايكملو جميع الأنشطة ديالهم إلى آخر يوم من عمر الحكومة. ف المقابل بانت الداخلية خدات زمام الأمور ف عدد من الملفات، خصوصا ملف برامج الجيل الجديد من التنمية اللي دعا سيدنا باش تدار ويكون فيه حوار مجتمعي.

الداخلية بعدم حضورها ف نشاط وزير الفلاحة، عطات مساج “الحياد” مع أنشطة الوزراء فهاد السنة الانتخابية.

يمكن يتفسر عدم حضور العام أو الوالي، كذلك بالصراع السياسي والحزبي، بين وزير الفلاحة البواري (الأحرار) ونزار بركة وزير التجهيز والماء (أمين عام حزب الاستقلال)، وهو الصراع لي كان مستمر طيلة الفترات الأخيرة.

بواري اختار يطلق الموسم الفلاحي من دائرة مولاي عبد السلام، وهي المعقل التاريخي لعائلة بركة، وهي كذلك المعقل الانتخابي لنزار بركة. ضربة قوية دارها بواري خصوصا وأن الفلاحين والكسابة فهاد الدائرة فرحو بزاف بهاد الزيارة لي غايكون عندها تأثير كبير على المستقبل السياسي لحزب الاستقلال فهاد الدائرة.