كود سبور//

دار محمد امهيدية والي جهة الدار البيضاء سطات، صباح اليوم الثلاثاء زيارة لتيران مركب محمد الخامس بالدار البيضاء.

وجا الوالي محمد امهيدية لستاد دونور باش يتفقد الاشغال ديال الملعب فين وصلات، اللي مسدود مدة هادي باش يتصلح استعدادا لكاس افريقيا 2025.

وكاتجي زيارة الوالي امهيدية لملعب مركب محمد الخامس، بعد الجدل اللي ناض على شكل الغطاء الخارجي، وهو الغطاء اللي عطى الوالي التعليمات ديالو باش يحيدوه حيث الشكل ديالو ما زوينش وما عاجبش البيضاويين، وهذا الشي بالاضافة للوقت اللي مخصص باش تكمل الإصلاحات حيث خاصها تسالي قبل نهاية 2024.