وكالات//

تْنقّل توماس ماركل، اللي عندو 81 عام، وْهو والد ميغان ماركل اللي مقاطعاهم من نهار تزوّجات بالأمير هاري فـ2018، لقسم الإنعاش فالفلبين بعدما دارو ليه عملية مستعجلة، على حساب ما قال ولدو.

وحسب “ديلي ميل”، قال توماس الابن بلي خداو الأب ديالو للسبيطار من بعد ما تزّادت عليه الحال فدارو نهار الثلاثاء، والفحوصات بيّنات بلي حياتو كانت مهددة بزاف. دار عملية دامت ثلاث ساعات، ودابا خاصّو يدير عملية ثانية باش يشدو جلطة دموية.

توماس ماركل كيعاني من مشاكل صحية من سنوات، ومن بينها جوج نوبات قلبية قبل نهار عرس بنتو اللي منعوه يحضر. وزيد عليها السكتة الدماغية الكبيرة اللي جاتو فـ2022 وخلاتو ما يقدرش يهضر واحد المدة، ورجع شوية بشوية بعد العلاج، ولكن ولا fragile بزاف فهاد السنين الأخيرة.

سامانثا ماركل، الأخت من الأب ديال ميغان، قالت بلي الضغوطات اللي مرّات عليهم فهاد السنوات أثرت بزاف على صحتو: “هو راجل قوي، ولكن دازت عليه كثر من القياس. كنتمنى يكون قوي باش يتجاوز هاد الأزمة.” وزاد توماس الابن، اللي هو الراعي الرئيسي ديال الأب ديالو من بعد السكتة الدماغية، وقال بلي كيتمنى من ميغان تورّي شوية ديال الرحمة: “غير اللي كنتمنى هو تبيًن ميغان شوية التعاطف معاه. راه كيتقاتل على حياتو.”

توماس ماركل مشى يعيش فالفلبين مع ولدو فبداية هاد العام، جزئياً باش يبعد على التذكير المتواصل بكونو مقطوع من ميغان. وهو من مدة وهو كيعبر على الرغبة ديالو يشوف حفيديه، آرتشي اللي عندو ست سنين، وليليبت اللي عندها أربع سنين، حيث ما عمر شافهم.

العلاقة المتوترة بينو وبين ميغان راجعة جزئياً لتعاملو مع المصورين قبل زواجها، اللي خلا ميغان والأمير هاري يغضبو. ومع ذلك، باقي كيذكر توماس اللحظات الزوينة اللي جمعتو مع ميغان فطفولتها، ودعمو ليها فالقراية وتشجيعو ليها باش تكون واثقة من راسها ومنفتحة على الآخر.