كود -FRANCE24//

الهند قررات تمنع عرض فيلم “صوت هند رجب”، اللي كيعاود قصة بنت فلسطينية ماتت بالقرطاس ديال الجيش الإسرائيلي فغزة، بسبة أنه ممكن يضر بالعلاقات بينها وبين إسرائيل،  الفيلم من إخراج كوثر بن هنية وكيعتمد على قصة حقيقية وقعات خلال الحرب.

موزع الفيلم فالهند قال بلي المجلس المسؤول على الترخيص ما بغاش يوافق على عرضو، حيث اعتابرو حساس سياسياً، وخا  أنه ما كان حتى قرار رسمي مكتوب ،وعبّر على الاستغراب ديالو حيث الفيلم تعرض فدول كثيرة وحتى فإسرائيل.

الهند فالفترة الأخيرة قوات العلاقات ديالها مع إسرائيل فمجالات متنوعة، وكتحاول توازن بين هاد الشي وبين المواقف التاريخية ديالها الداعمة لفلسطين، فالمقابل انتاقد سياسييين هنود القرار واعتابروه ضد حرية التعبير.

الفيلم كان مرشح للأوسكار وربح جائزة فمهرجان البندقية، وكيعاود  تفاصيل مؤثرة على الطفلة هند رجب، اللي بقات كتهضر مع الهلال الأحمر لساعات قبل ما تتقتل، والتسجيلات الحقيقية ديالها كانت من أقوى عناصر التأثير فالفيلم.