عمر المزين – كود///

تدخلات فرق الهندسة العسكرية التابعة للقوات المسلحة الملكية، اليوم الاثنين، باش تنقذ عدد من المواطنين فدوار درقاوة اللي تابع لجماعة الحوافات بإقليم سيدي قاسم، بعدما طلع منسوب الما بزاف بسبب الشتا الغزيرة اللي عرفتها المنطقة فالساعات اللخرة.

وحسب مصادر محلية، لـ”كود”، فإن العملية دازت فتنسيق مع السلطات الإقليمية والدرك الملكي والوقاية المدنية، فين تسخرات تجهيزات لوجستيكية مهمة وقوارب مطاطية باش يوصلو للناس اللي تحاصرو فديورهم وما قدروش يخرجو بسبب السيول.

وتم نقل العائلات اللي تْنقذات لمراكز إيواء مؤقتة متوفرة فيها الظروف الأساسية، من ماكلة وأغطية وتتبع صحي، وذلك فإطار التدابير المستعجلة اللي خداوها السلطات باش يحافظو على سلامة المواطنين ويتفاداو أي خسائر فالأرواح.

وكتجي هاد العملية ضمن مجهودات كبيرة اللي كديرها مختلف المصالح المتدخلة فعدد من مناطق البلاد لمواجهة تقلبات الطقس، حيث كاينة تعبئة شاملة ويقظة عالية للتدخل فأي لحظة إلا تطلب الأمر.

وما زالت فرق التدخل مرابطة فعين المكان وكتراقب الوضع عن قرب، فانتظار تحسن الأحوال الجوية ورجوع الأمور لطبيعتها.

https://www.facebook.com/share/17rBor1eXh/