كود سبور//

كشفت تقارير إعلامية نگليزية أن الدولي المغربي نصير مزراوي، لاعب مانشستر يونايتد النگليزي عندو مشكل فالقلب.

وحسب موقع The united HQ القريب من مانشستر يونايتد، فنصير مزواري عندو مشكل عدم انتظام ضربات القلب، ويخضع للعلاج حاليا، وأن الغياب ديالو غايكون لمدة شهرين على الأقل، وقال نفس المصدر أن اللاعب المغربي كانت يمكن عندو مشاكل شحال هادي فالقلب.

للإشارة فنصير مزراوي ما قدرش يكمل ماتش مانشستر يونايتد ضد أستون فيلا قبل ايام فبطولة النگليز، والمدرب ديالو إريك تين هاگ ما بغاش يقول شنو عندو وقال إنهم غايتسناو الفحوصات الطبية، وبالمقابل قرر الناخب الوطني وليد الركراكي يحيد اللاعب من لاليست ديال المنتخب المغربي فالتوقف الدولي ضد أفريقيا الوسطى، ودار بلاصتو لاعب الرجاء الرياضي يوسف بلعمري.