كود الرباط//

المهدي بنسعيد، الفتى المدلل في البام، او الرجل للي قدم راسو بأنه رجل أعمال فالانتخابات ديال 2021، كيفاش رجل أعمال وشنو خدمتو وتخصصو، حتى معارف وهادي معروفة عند أوساط المال والأعمال بالعاصمة.

قصة صعود بنسعيد، غريبة ولكن ساهلة، هاد البروفايل معندو لا تاريخ نضالي ولا تكوين سياسي، وحتى مستواه التعليمي كولشي عارفو فاش كان كيقرا ف ليسي ديكارت فحي أكدال (قبل 2003 العام فاش شد الباك)، كسول وكيتغيب وكيتعطل على الدروس.

من الكسل الدراسي للرقي السياسي، قصة شاب تولد سنة 1984 من والدين يساريين، باه سمير بنسعيد، أحد قادة منظمة إلى الأمام الماركسية، والوالدة ديالو سميرة كيناني، القيادية في الجمعية المغربية لحقوق الإنسان.

وكيف كيقول المثل “ليس الفتى من يقول كان أبي ولكن الفتى من يقول ها أنا ذا”، فالمهدي بنسعيد لا علاقة له بمسار والديه ولا بأفكارهم، التحق هاد الشاب بحركة لكل الديمقراطيين سنة 2008 وللي نتجات حزب الأصالة والمعاصرة، الحزب لي ساهم في بلقنة المشهد الحزبي وخلطو وجلطو ولا أعلى أبرز تخليطة دار هي فـg8 جمع كولشي باش يطيح البي جي دي، لكن صدق عطا كادو لبنكيران اللي ربح انتخابات 2016. بمعنى هاد الخلطة هي كادو مجاني باش يطلعو الإسلاميين لي ضيعو المغرب ف10 سنوات مكاتنتش فيها لا ثورة فالتشريع ولا تطور من غير البهرجة السياسية.

بنسعيد دخل أول مرة للبرلمان سنة 2011، وخدا حقيبة كبيرة، رئيس لجنة الخارجية بمجلس النواب، كيفاش دار ليها وشكون دافع عليه، كولشي كيعرف الصورة لي تسوقات على بنسعيد، أولا كان الفتى المدلل فالبام وكان قريب من بنت الباشا فاطمة الزهراء المنصوري، ولكن الصورة الأكثر شهرة هي نيت صورة حقيقية فاش هز حقيبة لمسؤول كبير فالدولة، فؤاد علي الهمة، مؤسس البام، ودبا مستشار ملكي مور ما قطع العلاقة ديالو مع البام منذ سنوات.

هاد الوزير لي معندوش الشجاعة السياسية باش يواجه بها الخصوم السياسيين والحلفاء (الحلفاء لي كيتحولو للخصوم فلحظات انتخابية أو هزات سياسية)، كيلوح الكرة للصحافة، مور تصريحه لـ”كود” وللي وصف به نشاط كبير لشبيبة الأحرار بـ”الشعبوية السياسية”، رجع كيتهم موقع “كود” بلي طيح النيفو.

أجيو تعرفو شكون مطيح النيفو، من اللول، وزير هاز مسؤولية وزارة التواصل ومقادش عليها، مكيحترمش الصحافة وحرية التعبير، وهمو الوحيد هو كولشي يقول العام زين، وباش كولشي يقول العام زين الوزير الذكي قاليك خاص الصحافة تلعب أدوار دبلوماسية وتأثر فما هو اقليمي ودولي، يعني خاص الصحافة تعطي صورة وردية على البلاد. راه الصحافة خدمتها باينة، ماشي مهمتها دير التسويق الإعلامي لك وللوزراء ووو.. كيف باغي نتا وبوريطة. الصحافة كتراقب وتكتب لي كتشوف وتوصف الواقع وتسمع لنبض المجتمع وتوصل أصوات المهمشين وغير المهمشين.

هاد الوزير، كون كانت عندنا معارضة برلمانية، راه خاص يديرو عليه مهمة استطلاعية، ولا لجنة تقصي الحقائق، على الصفقات الكبيرة اللي دار، على مارشيات بناء قاعات السينما وتسويق المهرجانات، وعلاقتو بعدد من مسيري الشركات لي خداو مارشيات من وزارة الثقافة والشباب والتواصل.

أجيو تعرفو شكون مطيح النيفو، ف قطاع الثقافة فشل كبير ف حماية التراث وكولشي عارف الحصيلة الضعيفة ف تسجيل التراث المغربي في اليونسكو، وماشي في الأسيسكو لي كتسجل التراث الاسلامي والعربي لي كيسوق ليه هاد الوزير. وزيد عليها سياسة ثقافية، كاينا فقط العشوائية وكثرة المهرجانات غير فالرباط ونقل معرض الكتاب من كازا باش يكون قريب ليه، وصفقات كتعطا لشركة معروفة بوحدها حاكما لازون avant scene .. هذا هو النيفو طايح.

أما فقطاع الشباب، مدار فيه والو من غير بطاقة الشباب باش الشباب يمشيو للمسارح وو، الشباب فهاد الوقت محتاجين لي يسمع ليهم وللي يجلس معهم وهاد الشباب كيفضلو يحركو على أنه ياخذو البطاقة ديالك لي مصالحة لوالو. هذا هو النيفو الطالع. هاد الشباب اسي بنسعيد هوما لي مشاو لسبتة يحركو. هوما لي رسمو صورة كحلة على واقعنا.

أما فقطاع التواصل، غرقتيه بالكونطرات ديال التسويق بالفيديوهات (كبسولات) ومكاين غير الملايين تترعرع.. وشبهات كثيرة بلي مقربين منك حتى هوما مستفيدين وهنا خاص مهمة استطلاعية ومفتشية وزارة المالية دير تقاريرها، ولما لا لجنة تقصي الحقائق.