كود كازا//

مفاجأة كبيرة كانت البارح في ملف متابع فيه واحد ولد الفشوش بجرائم ارتكاب حادثة سير مميتة والفرار ولي كان مورط فيها ضابط حتى هوا حيت ماقامش بالإجراءات اللي تينص عليها القانون. النيابة العامة فكازا طلقاتو!

السيد اللي مات متقاعد فالمكتب الوطني للكهرباء، وهادي عام والبحث جاري والناس تيتسناو خصوصا أن الحادثة تسببات في مأساة لعائلة الضحية. وبات ولد الفشوش مشهور في لافيراي تاع سباتة تبيع البياس دايل الطوموبيلات وفي الوقت نفسو ولا حتى هوا من صحاب الملاسة ودار شي مشاريع ديال السكن لي سببات احتجاجات في المنصورية، وما صورو منو الضحايا حتى حاجة، وهاهوا اليوم خرج ولدو من حادثة سير مميتة، والفرار.

المعروف أن النيابة العامة تاع كازا تاتشدد في الحوادث المميتة، وتاتعتاقل المتسببين فيها، حيث الحبس عامر ببزاف د النماذج، و ملي كتكون جنحة الفرار، وخا متكونش الحادثة مميتة مولاها تيتعتاقل، ودابا هادا جمعهوم بجوج قتل وهرب، وها هو حر طليق. كيفاش زعما واش بدا هادشي تاع العقوبات البديلة بلا خبار المسؤولين في النيابة العامة ووزير العدل؟

دابا هاد القضية ماكنطالبوش فيها بالتحقيق في الظلم اللي تعرضات لو الأسرة تاع هاد العساس اللي مات مسكين، تنطالبو غير النيابة العامة تطلق كاع دوك اللي دارو حوادث مميتة ولا دارو حوادث سير مع الفرار، على الأقل يحسو المذنبين بالمساواة، أما الضحايا فعمرهم ما يحسو بالمساواة، لأن حتى الحبس ما يعوضش ليهم لي ضاع.