كود -وكالات //

فإيران التقارير كتقول باللي عدد القتلى وصل على الأقل لـ1230 واحد مني بدات الضربات الأمريكية-الإسرائيلية ومن بين الأحداث الصعيبة لي كانت وقعات دقة جوية ضربات مدرسة ابتدائية فمدينة ميناب وخلات كثر من 160 قتيل حتى لدابا، كما تعرضات مدن كثيرة فإيران لقصف استهدف مباني حكومية ومنشآت عسكرية وحتى مرافق مدنية.

فـإسرائيل نجمة داوود علنات على موت 11 مدني بسبب الصواريخ الإيرانية، بعض الضربات قاست مدن وسط إسرائيل ومناطق قريبة من القدس، فـلبنان وزارة الصحة قالت باللي الحرب خلات 123 قتيل و683 جريح حتى اليوم.

فـ الكويت، على الأقل 10 الناس ماتو، بينهم مدنيين، كما تقتلو جوج عساكرية كويتتين فهجمات إيرانية، وزيد عليهم 6 جنود أمريكيين كانو تقتلو فهجوم ضرب مركز عمليات قريب من ميناء مدني.

فـالإمارات العربية المتحدة، السلطات كانت علنات على موت 3 مدنيين من العمال الأجانب وتبليساو 68 واحد، الصواريخ والطائرات المسيّرة الإيرانية استهدفات مناطق مختلفة، وحتى دبي اللي معروفة بالأمن والاستقرار تعرضات لبعض الأضرار.

فـالبحرين، مات عامل آسيوي وفالعراق ماتو بزاف ديال الناس، خصوصاً من الميليشيات المرتبطة بإيران مورا ضربات المريكانية والإسرائيلية، ولكن العدد الدقيق مازال ما توضحش رسمياً.

أما فـ عُمان، تقتل بحّار هندي واحد مورا هجوم بدرون ضرب ناقلة نفط حدا مسقط، وتجرحو 4 بحارة آخرين.

وفـ سريلانكا، لي بعيدة نسبياً عن ساحة القتال، غرقات سفينة حربية إيرانية بعد ما استهدفاتها غواصة أمريكية فالمحيط الهندي، وفيها 87 جثة من طاقمها.

حتى الدول اللي ما كانوش طرف مباشر فالحرب تأثرات. فـالأردن تقاسو 5 الناس بسبب ديشي الصواريخ، وفـأذربيجان ضربو 4 مدنيين مورت هجوم بدرون جاية من إيران.