گود سبور- واشنطن//

أكد ابراهيم النقاش مساعد المدرب فالوداد الرياضي، أن الفريق الأحمر واجد لمواجهة فريق العين الإماراتي فالجولة الثالثة من كاس العالم للأندية بالعاصمة الميريكانية واشنطن.

وقال ابراهيم النقاش خلال الندوة الصحافية اللي كاتسبق ماتش الوداد والعين، واللي حضرها فبلاصة المدرب أمين بنهاشم حيث دار كسيدا: “أنا هنا بتعليمات من المدرب أمين بنهاشم، وهو الحالة ديالو بين يدين الطاقم الطبي للنادي، وقرار الحضور ديالو فالماتش بين يديهم”.

ووضح النقاش، وقال: “هاذ البطولة جات مع نهاية الموسم والماتشات كانو قويين ومتقاربين، بالإضافة إلى أن اللاعبين جايين عيانين من الموسم اللي سالا، وهادي تجربة باش نوجدو للبطولات الجايين فالموسم الجاي البطولة الاحترافية وكأس العرش وكأس الكونفدرالية”.

وهضر ابراهيم النقاش على الحالة الصحية ديال عبد المنعم بوطويل، وقال: “حس بشي ألم فالفخد ديالو وقال للطاقم الطبي الحالة ديالو فالتداريب البارح، والقرار النهائي عند الطبيب ديال الفريق”.

اما على ماتش العين فقال ابراهيم النقاش: “عندنا حنا وهما نفس الطموحات، وكل واحد فينا باغي يربح أول ماتش له فكاس العالم للاندية، هما عندهم فريق واعر وعندو تاريخ كبير وجمهور قوي، ونتمناو يكون الماتش قوي وزوين وفيه اللعب نظيف”.