كود الرباط//

من المتوقع أن يبعث رئيس مجلس المستشارين النعم ميارة بداية هاد الأسبوع برسالة “تنبيه” للمستشار البرلماني يحفضو بنمبارك، عضو فريق الحركة الشعبية، وذلك على خلفية الفوضى والسب والقذف والتهديد لي صدر منو تجاه البرلمانيين خلال جلسة المساءلة الشهرية لرئيس الحكومة الأسبوع الماضي.

وقالت مصادر “گود” بلي رئيس المجلس النعم ميارة غادي فاتجاه تطبيق مقتضيات المادة 187 من النظام الداخلي للمجلس، ولي كتقول أنه على الرئيس توجيه “تنبيه” لعضو المجلس في حالة صدر منو سب أو قذف أو تهديد تجاه عضو أو مجموعة أعضاء المجلس، وهو ما تأكد منه النعم ميارة بعد إعادة مشاهدة جزء من الشريط المسجل  للجلسة لي كيوثق بوضوح لهذه الحادثة.

وأضافت المصادر أن المستشار يحفضو بنمبارك حاول يتصل برئيس المجلس باش إعتاذر ليه وباش ما تطبقش فحقو مقتضيات النظام الداخلي، لكن النعم ميارة رفض اعتذارو وقال بلي بصفتو رئيس المجلس راه ملزم بتطبيق المادة 187 من النظام الداخلي وخاصة ملي وصل الأمر للتهديد الواضح والصريح لي وجهو يحفضو بنمبارك للمستشار البرلماني الشاب من التجمع الوطني للأحرار كمال أيت ميك.

المستشار البرلماني الحركي بنمبارك بان بلي تورط فهاد القضية بزاف، وبان بلي مشى ضحية جهات بغات تصفي حسابات مع رئيس الحكومة وخاصة بسبب مشروع وكالة التنمية الفلاحية بالداخلة المقدر بـ5 آلاف هكتار.

هاد المستشار البرلماني بقا بوحدو بحيث تخلاو عليه زملاؤو فالحركة الشعبية بعدما قال فهاد الجلسة بلي كيطلب “تحقيق ملكي” فمشروع الداخلة، وهو الشي لي ما قبلوش المستشار كمال أيت ميك لي قال ليه “مامنحقكش تقحم اسم سيدنا فمزايدات سياسوية”. هاد الشي لي غضب المستشار يحفضو ودفعو يسب ويهدد المستشار كمال أيت ميك. فهاد اللحظة تدخل رئيس الفريق الحركي وطلب باش توقف الجلسة لعشرة دقائق باش يحاول ينبه المستشار يحفضو لخطورة التصرفات لي كيقوم بيها. وفعلا، بعد استئناف الجلسة، رجع هاد الأخير للجلسة وبقا ساكت وكان وجهو صفر.

المستشار يحفضو بنمبارك ما بانش البارح فاجتماع المجلس الوطني للحركة الشعبية لي تعقد فسلا، وفقط قريبو الجماني لي كان حاضر وبان عليه التدمر من هاد القضية وخاصة بعدما تخلات قيادة الحزب على نسيبو يحفضو. هاد الأخير باين بلي ما بقاش عندو أي حظ باش يفوز بمقعد فمكتب مجلس المستشارين فبلاصت المهدي عثمون خلال التجديد النصفي لهياكل المجلس ف أكتوبر المقبل. المصادر قالت بلي الحظوظ في ذلك متوفرة جدا لصالح المستشار الحركي نبيل اليزيدي لي مدعوم من طرف الأمين العام لحزب السنبلة محمد أوزين.