كود – وكالات //

مع السخونية، بزاف ديال الناس كيختارو ينعسو بلا حوايج باش يحسو بالراحة ،كيقول الدكتور يوهان فيربراكن، المختص فطب النعاس، بلي هاد العادة عندها فوائد صحية، خصوصاً بالنسبة للناس اللي كيتعرقو بزاف فالليل أو اللي كيعانيو من السخونية الزايدة ، وزاد أن النعاس بلا حوايج كيقدر ينقص من خطر بعض الالتهابات المهبلية.

الخبير وضح أن الجسم خاصو يبرد شوية باش يقدر يدخل نعاس ، والنعاس بلا حوايج كيعاون فهاد العملية ،ولكن نبه بلي إلا كان الجو بارد بزاف، الشخص يقدر يفيق من النعاس بسبب البرد، وبالتالي الجودة ديال النوم كتولي قل، يعني الأهم هو الواحد ما يكون لا سخون بزاف ولا بارد بزاف.

ومن جهة أخرى، قالت المعالجة المختصة فالعلاقات الزوجية سارة هيرتنس بلي النعاس بلا حوايج  كيقدر يقوي الإحساس بالقرب والحميمية بين الزوجين، خصوصاً إلى  كاين احتكاك مباشر بين اللحك، هاد اللمس ديعاون الجسم يفرز هرمون الأوكسيتوسين، اللي كيخفف التوتر وكيعزز الشعور بالأمان.

وضافت أن  اللي كينعسو بلا حوايج غالباً كيكونو مرتاحين مع أجسادهم وعندهم ثقة أكبر فالنفس، وكيحسو بإحساس ديال الحرية والراحة بعد نهار طويل.

وخا هاد الفوائد، كتقول هيرتنس بلي لبس البيجامة أو حوايج ينعاس حتى هو عندو دور فالعلاقة الزوجية، حيث كيخلي شوية ديال الغموض وكيزيد الفضول والرغبة بين الشريكين، وشبهات هاد الإحساس بحالا فتحتي شي كادو.