كود سبور//

أكد الدولي المغربي يوسف النصيري لاعب فنربخشة التركي، أنه هو وصحابو فالمنتخب المغربي معولين يكونو واجدين لكاس إفريقيا باش يخليوها هنا فالمغرب.

وقال يوسف النصيري فتصريح للموقع الرسمي ديال الجامعة الملكية المغربية لكرة القدم، على هامش تداريب الأسود استعدادا لماتش تونس وماتش البنين: “العام داز عني مزيان وكيفما كنت كانتمنى وتوقفت فنسبة الاهداف والماتشات وقدرت نلعب بزاف ديال الماتشات فاليوروبا ليگ وبطولة تركيا وفالمنتخب وتوفقت هذا العام احسن من الأعوام اللي فاتو”.

وكمل النصيري وقال: “المنتخب الوطني شي حاجة كبيرة بالنسبة ليا حيث كانمثل الشعب المغربي وكانتمنى هذا السطاج ندوزوه مزيان وبه غادي نوجدو لكأس إفريقيا الجايا، والهدف ديالنا فهاد الأشهر اللي جايا هو نوجدو مزيان لكوب دافريك باش تبقى هنا فالمغرب”.

وبخصوص الماتشات ديال الأسود بجوج ضد تونس وبنين اللي غايتلعبو فتيران فاس الكبير، قال النصيري: “بالنسبة ليا غانلعب فمدينتي اللي هي فاس وشرف ليا نلعب فيها وكانتمنى من الجمهور الفاسي يحضر بقوة ويشجع المنتخب المغربي”.