كود سبور//

رفض الدولي المغربي يوسف النصيري يمشي لفنربخشة التركي اللي حطو مبلغ مهم باش يسنيو معه، ولكن هو باغي فريق كبير فأوروبا او يبقى مع إشبيلية الإسباني.

وكشفت جريدة muchodeporte الإسبانية، أن العقد ديال يوسف النصيري مع إشبيلية غايسالي فعام 2025، وبالمستوى اللي كايقدم فيه اللاعب دابا ما غايقدرش الفريق الإسباني يجدد معه حيث ما بقاش النادي قادر يخلص هاد ليصالير اللي طالعين بسبب الأزمة اللي عندو، والحل هو يمشي اللاعب المغربي من الفريق فهاد الصيف، ولكن الغريب هو ان النصيري ما كايقلبش غير على لفلوس ولكن باغي فريق يستاهل المستوى ديالو وبلد يرتاح فيها حيث فإقليم الأندلس فالصبليون مرتاح بزاف.

وحسب نفس المصدر، راه قدم فنربخشة التركي بقيادة المدرب جوزي مورينيو عرض إلى إشبيلية فيوسف النصيري،  بقيمة 18 مليون أورو، مقابل انهم يتنازلو على العقد ديالو للأتراك مع امتيازات اخرى للاعب وصالير كبر من اللي كايشد فإشبلية، ولكن اللاعب المغربي رفض وتوقفت المفاوضات، حيث باغي فريق كبير او يكمل مع إشبيلية.