كود سبور//

وجه الدولي المغربي يوسف النصيري نجم فنربخشة التركي، ميساج قوي للمنتقدين ديالو، من ورا ما سالا ماتش الفريق ديالو ضد أندرلخت البلجيكي، البارح الخميس واللي ماركا فيه هدف وساهم فتأهل فنربخشة إلى ثمن نهائي اليوروبا ليگ.

وخرج يوسف النصيري وقال فسطوري على إنستغرام: “الهضرة عليا ساهلة، ياك؟ انتقاد خطواتي وأخطائي، وداكشي اللي كاندير وكانقول، ولكن اللي ما مفهموش هو أنك تكون بحالي، وتمشي فطريقي وتتغلب على داكشي اللي تغلبت عليه، وهذا الشي ما غاتقدرش عليه، حيث اللي كاتشوفو غير اللي باين”.

وكمل النصيري: “ورا كل خطوة كاين صراع ما عارفوش، ودموع ما بينتهاش، وقوة كان خاصني نلقاها ملي ما كان معيا حتى حد، أنا نتيجة الحروب ديالي، وما تقدرش تقلدني، غير كمل فهضرتك، إلى كان هذا الشي غايخليك تحس براسك مزيان، أما أنا غانبقى غادي مكمل فطريقي، ونبين بالأفعال داكشي اللي ما تقدرش الهضرة تحققو”.