كود عن 7/7

البروستاتا ماشي غير عضو مرتبط بالصحة والأمراض، ولكن عند بعض الرجال تقدر تكون حتى مصدر للمتعة الجنسية، وحتى توصل للنشوة، ومع، هاد الموضوع مازال كيعتبر من الطابوهات فالمجتمع، خصوصاً حيث كاين خلط كبير بين بعض الممارسات الجنسية والميول الجنسي.

البروستاتا كتكون تحت المثانة وقريبة من منطقة الشرج، وكتحتوي على عدد كبير من النهايات العصبية، وهاد الشي كيخلي تحفيزها عند بعض الأشخاص يعطي إحساس قوي ومختلف على النشوة المرتبطة بالقضيب، وبحسب أخصائية علم الجنس لورين واتيكامبس، النشوة البروستاتية ماشي بالضرورة كتكون مصاحبة للقذف، وكتقدر تكون أطول وأعمق بالنسبة لبعض الرجال.

الأخصائية كتوضح للموقع البلجيكي أن الوصول لهاد النوع من النشوة كيحتاج بالأساس للرغبة والاسترخاء، حيث الدماغ هو العنصر الرئيسي فالنشوة الجنسية. وكتشير بلي كل جسم مختلف، وبالتالي ماشي كل الرجال غادي يحسو بنفس الإحساس أو حتى يستمتعوا بهاد النوع من التحفيز.

هاد الممارسة كتواجه حتى بزاف ديال الأحكام المسبقة، خصوصاً الاعتقاد بأن الاهتمام بالتحفيز بها كيعني بالضرورة أن الشخص عندو ميول مثلية. الأخصائية كتأكد أن الممارسة ما كتحددش التوجه الجنسي، وأن هاد الربط كيعكس بالأساس أفكار اجتماعية وصور نمطية راسخة.

وبعض الرجال اللي جربو هاد التجربة وصفوها بأنها مختلفة بشكل كبير على النشوة التقليدية، اما آخرون قالو إنهم ما ارتاحوش ليها وما عندهمش رغبة يعاودوها. يعني التجربة ماشي واحدة عند الجميع، والموضوع كيبقى مرتبط بالتفضيلات الشخصية.

ومن الناحية الصحية، المختصة كتأكد على أهمية النظافة، الاستعداد، والوقاية من الأمراض المنقولة جنسياً، إضافة إلى ضرورة التواصل الواضح والموافقة الصريحة بين الشريكين قبل أي ممارسة.

وبالنسبة للخبراء، النقاش على النشوة البروستاتية كيساهم حتى فإعادة التفكير فالصورة التقليدية ديال الجنس، اللي كتختزل المتعة فالإيلاج والقذف فقط. فالجسم كامل فيه مناطق حساسة، والدماغ كيبقى العنصر الأساسي فالإحساس بالمتعة.

وفالأخير، ماشي ضروري كل شخص يجرب هاد النوع من الممارسات. المتعة الجنسية كتختلف من شخص لآخر، والأهم هو الرغبة، الراحة، التواصل والموافقة بين الأزواج.