وكالات//

هاجمت النجمة العالمية بريتني سبيرز عائلتها، اللي قاطع معاهم العلاقة، علانية فبوست على إنستغرام بمناسبة عيد الميلاد، من بعد ما دوزات العطلة مع ولدها جايدن اللي عندو 19 عام.

وشاركات المغنية اللي عندها 44 عام تصويرة ديال شجرة عيد الميلاد معمّرة بالزينة، ومعاها رسالة موجهة لعائلتها قالت فيها:

“عيد ميلاد متأخر لعائلتي الزوينة اللي ما عمرها حرماتني من الاحترام، وما أذّاتنيش، وما دارت حتى شي حاجة ما مقبولة ولا سببات ليا صدمة ما يمكنش تتصلّح”.

ومن بعد زادت رسالة موجهة لبنت أختها آيفي اللي عندها 7 سنين، عبّرات فيها على حبها ليها وقدّاش موحشاتها.

هاد المنشور جا من بعد مدة طويلة ديال التوتر والمشاكل العائلية. وبريتني كانت كتعاود تبني العلاقة ديالها مع ولادها، جايدن وشون اللي عندو 20 عام. وحسب مصدر لموقع People، بريتني دوزات وقت زوين فاحتفالات عيد الميلاد مع جايدن، بينما شون بقى فولاية لويزيانا بسبب التزامات الخدمة ديالو، ودوّز العطلة مع ختو جيمي-لين وعائلتها، وزيد عليهم الأم ديالهم لين. وشاركات جيمي-لين تصاور عائلية ديال الاحتفال بعيد الميلاد فحسابها على إنستغرام.

والعلاقة بين بريتني وعائلتها متوترة من سنين، وزادت تعقّدت من بعد ما تسالات الوصاية القضائية اللي دامت 13 عام فشهر نونبر 2021. وفيناير 2022، هاجمات علانية مذكرات ختها جيمي-لين بعنوان Things I Should Have Said، واتهماتها بأنها استغلات الماضي ديالها باش تزيد فالمبيعات. وحتّى باها، جيمي سبيرز، اتهماتو بأنه هو المسؤول على الوصاية، وأكدات باللي خاص كل واحد شارك فيها يتحاسب.