كود سبور- كازا//

اكدو المسؤولين بجماعة الدار البيضاء، أن الاشغال بملعب مركب محمد الخامس، غاديا مزيان وأن التيران غايكون واجد فالموعد المحدد له، أي مع بداية 2025 كأقصى حد.

وبعدما دارت لجنة القيادة وتتبع المرافق الرياضية بالدار البيضاء، اجتماع اليوم الثلاثاء مع شركة “سونارجيس” المكلفة بإصلاح مركب محمد الخامس، قال عبد اللطيف الناصيري نائب عمدة الدار البيضاء، والمكلف بالقطب الرياضي بالجماعة فتصريح للصحافة: “الهدف من هذا الاجتماع كان هو تتبع تقدم الأشغال، والأشغال فدونور غاديا بوثيرة معقولة ومناسبة”.

وكمل عبد اللطيف الناصيري، وأكد: “الأشغال الكبيرة غاتسالي مع نهاية 2024 والهضرة اللي كاتدور فالفيسبوك غير كذوب والتيران غايحل فالموعد ديالو”.

أما عضو لجنة القيادة وتتبع المرافق الرياضية بالدار البيضاء وعضو مجلس مدينة الدار البيضاء، كريم الگلايبي قال: “الوالي امهيدية واقف شخصيا على الاشغال فدونور والعمدة حتى هي، وراه الأشغال غاديا مزيان وعندنا أمل أن التيران يتفتح فهاد الموعد”.