گود كازا//

باغي سعيد الناصيري الرئيس الأسبق للوداد الرياضي، والقيادي السابق بحزب الأصالة المعاصرة المتابع فقضية ما يعرف بـ”أسكوبار الصحرا”، (باغي) يجيو الشهود للمحكمة ويواجهوه بالشهادات اللي دلاو بها قدام الضابطة القضائية، واللي طعن الناصيري فيها.

وطالب سعيد الناصيري قدام هيئة المحكمة بغرفة الجنايات الإبتدائية لدى محكمة الاستئناف بالدرالبيضاء،

خلال جلسة اليوم الجمعة، طالب الناصيري باش يجي الحاج احمد بنبراهيم “المالي” ولطيفة رأفت اللي كانت مزوجة به وعبد الواحد شوقي البرلماني عن حزب الأصالة والمعاصرة وتوفيق الزنطار وگاع الشهود اللي فالقضية باش يقولو الشهادة ديالهم، وطعن فگاع داكشي اللي قالوا بخصوص أنه تسلم الفيلا ديال كاليفورنيا من عند المالي عام 2019، وقال إنه شاريها من عند المير القاسم، وجاب حتى عقد الزواج ديال لطيفة رأفت والمالي وقال بللي تزوجت هي وياه فتاريخ 16-01-2014.

سعيد الناصيري أكد للمحكمة أن الشهادات ديال هاد الناس ماشي مسؤولة وكل واحد فيهم كان كايجي يقول هضرة قدام الضابطة القضائية وكايمشي بحالو بدون مسؤولية، وهذا الشي تسبب فسلب الحرية ديالو، وعبر على التشبث ديالو بالحضور ديالهم للمحكمة ويواجهوه بالشهادات ديالهم.