كود كازا//

نفى سعيد الناصيري الرئيس الأسبق للوداد الرياضي والقيادي السابق بحزب الأصالة والمعاصرة والمتابع فما يعرف بقضية “اسكوبار الصحرا” اي علاقة له بعصابة للتهريب الدولي للمخدرات، عكس داكشي اللي تاهمو به الحاج احمد بنبراهيم او الملقب بـ “المالي”، وكشف السياق اللي عرف فيه المالي وكيفاش تعرف عليه.

وخلال جلسة الاستماع اليوم الجمعة  جاوب سعيد الناصيري هيئة الحكم، ونفى مرة اخرى علاقتو بالمخدرات او بشي شبكة للتهريب الدولي ديال المخدرات، وهضر على كيفاش عرف الحاج احمد بنبراهيم، وقال حسب تصريح المحامي ديالو امبارك المسكيني لـ ميكرو “گود”: “المالي نهار اللي جا راه ماجاش كشخص عادي، راه جا كديبلوماسي مالي، وجا كشخص مقرب من الرئيس المالي، جا كشخص كنت كانساقبلو مع السفير المالي، وففترة اللي المغرب وسيدنا كان متوجه للاستثمار فإفريقيا بعد زيارتين لمالي، وانا استقبلتو وتعاملت معه بهاد الصفة”.

وكمل المحامي امبارك المسكيني، واضاف انه سعيد الناصيري قال للمحكمة: “ما عمرني كنت كانعرف ان المالي تاجر مخدرات، تكشف الظروف من بعد انه تاجر مخدرات، حنا عمرنا ما كنا كانتعاملو مع تجار المخدرات وما عمرنا ما كنا كانشوفو المستثمرين اللي غايجيو انهم غايكونو تجار مخدرات، المالي شخص كان يدعي انه عندو جواز ديبلوماسي، وعندو علاقات ديبلوماسية كبيرة، وبان اليوم انه شخص كانت عندو اهداف اخرى، وانا اشكك واش يكون مالي، يقدر يكون من شي بلد مجاورة اخرى”.

https://www.facebook.com/share/v/15AUiiYhL2/?mibextid=wwXIfr