كود كازا//

نكر سعيد الناصيري الرئيس الأسبق للوداد الرياضي، الاتهامات اللي وجهها له الحاج احمد بنبراهيم الملقب بالمالي، فما يعرف بقضية “اسكوبار الصحرا”، بأنه استولى له على 5 شقق بمدينة السعيدية، كان باعها لع وما خلوص فيها، وانه نصب عليه فشي طوموبيلات.

سعيد الناصيري نفى قدام غرفة الجنايات الابتدائية بمحكمة الاستئناف بالدار البيضاء، خلال جلسة اليوم الجمعة، الاتهامات ديال الحاج بنبراهيم، وقال بوضوح للمحكمة: “يجيب لينا شي دليل على هذا الشي والمحكمة تقرر إعدام الناصيري وتنهيه من الحياة”.

وبالمقابل اكد سعيد الناصيري انه شرا من عند المالي 2 ديال البرطمات، بالمقايضة وعطاه طوموبيل ميرسيدس، وهي الطوموبيل اللي كايقول المالي انها مِلك ديالو، والطليقة ديالو لطيفة رأفت كاتقول فالمحاضر انها ركبت فيها عام 2013، والناصيري ورد على الهضرة ديالهم وقال ان الطوموبيل موديل ديال عام 2014 يعني كيفاش غاتكون خارجة عام 2013.