كود كازا//

كان سعيد الناصيري الرئيس الأسبق للوداد الرياضي، والقيادي عند حزب الأصالة والمعاصرة، تايق فراسو وهو كايعطي الإفادة ديالو، اليوم الجمعة قدام هيئة المحكمة بغرفة الجنايات الإبتدائية لدى محكمة الاستئناف بالدرالبيضاء، الاستماع للمتابعين في ملف “اسكوبار الصحرا”، اللي متهم فيه هو وعدد من الأشخاص ومن بينهم عبد النبي بعيوي الرئيس السابق لجهة الشرق.

ووقف سعيد الناصيري قدام المحكمة وهو لابس جاكيط كوير كحلة وسروال دجين زرق، وكان محسن وبات محافظ على الاناقة ديالو، وكان كايبتسم فعدد من المرات على امتداد 3 ساعات اللي وقفها قدام القاضي اللي سولو وكان كايجاوب على الاسئلة المتعلقة بفيلا شارع مكة وبعلاقة بالحاج بنبراهيم (المالي) وعلاقتو بمير بلقاسم اللي باع له الفيلا وعلاقتو بعبد النبي بعيوب.

وكان كايبان سعيد الناصيري تائق فراسو قدام المحكمة وعطى عدد من الوثائق اللي دافع بها على راسو وباغي يبين البراءة ديالو، وكيفاش شرا الفيلا ديال شارع مكة من المير القاسم وامتى تسلمها وسكن فيها، ومن بينها لابونمو ديال الما والضو والتاريخ امتى بدأه.

سعيد الناصيري كان كايبتسم مرة مرة وكايشرب الماء وكايدير النظارة ملي كايبغي يقرا الوثائق اللي جايب باش يدافع على راسو، وقال للمحكمة: اشكر المحكمة على سعة صدرها حيث منحتني الوقت لتوضيح الامور.

واحد الوقت كان كايهضر سعيد الناصري بالزربة، وهو يقول له القاضي واش كاتعرض، وجاوب الناصيري وقال بإبتسامة: “الحماس يا سي الرئيس”، وقال بلي عطى غير 10% من المعطيات اللي تخرج هذا الملف من الخيال إلى الواقع.

وقال سعيد الناصيري فواحد اللحظة للمحكمة: “كون كنت كنعاود الأزليات كون حصلت.. أنا ما عندي حتى شي مشكل مع الضابطة القضائية ولكن مع أشخاص.. تعاملت كما يعامل المواطنين كاملين، وحنا فدولة القانون ومؤمن بالمحاكمة العادلة اللي كاتوفرها المحكمة”

وملي بغا القاضي يرفع الجلسة ديال اليوم وقال “موعد نداء السماء يقترب” فإشارة لصلاة الجمعة، وهو يقول سعيد الناصيري بعفوية “نسألكم الدعاء”.