كود كازا//

كشف سعيد الناصيري الرئيس الأسبق للوداد الرياضي والقيادي السابق بحزب الأصالة والمعاصرة، انه جاتو هدية مواطن سعودي قيمتها مليار و 800 مليون سنتيم، وهذا الشي فعام 2018.

ووضح سعيد الناصيري للمحكمة اليوم الجمعة، انه تلقى هدية قيمتها مليار و 800 مليون سنتيم من مواطن سعودي وكان معول باش يخلص بها الفيلا، اللي باعها له المير القاسم، ولكن قرر انه يخلص بها تكلفة مركب ويلنس اللي دابا فملكية الوداد الرياضي.

سعيد الناصيري، اكد لهيئة المحكمة انه ما عندوش مشكل يقول شكون هو المواطن السعودي اللي عطاه هاد الفلوس واخا هذا الشي يقدر يدير بلبلة، وقال انه صديق للمغرب، وان مبلغ مليار و 800 مليون سنتيم اللي هداها له تحولت له على 2 دفعات.

واكد سعيد الناصيري ان هذا المبلغ المالي ما عندو علاقة بصفقة بيع عقد اللاعب السابق للوداد اشرف بنشرقي للهلال السعودي، وان هاديك صفقة بوحدها فيها 2 ديال المليار.