كود سبور//

تدخل سعيد الناصيري رئيس الوداد الرياضي بصرامة باش يفرض الانضباط داخل الفريق، من بعدما صدرت مجموعة من السلوكيات الهاوية من شي لاعبين ملي كان الفريق فالرحلة ديال الجزائر  باش يلعب ضد شبيبة القبائل الجزائري.

وكشف مصدر مطلع، أن إدارة الوداد الرياضي قامت بتوقيف اللاعب حمزة ايت علال فانتظار يدوز أمام اللجنة التأديبية وهادشي حيث دخل فمشادات مع مسؤول الأمتعة ديال الفريق، وراه اللاعب تدرب البارح مع المجموعة من بعد الرجوع من لالجيري، ولكن اليوم توقف وما تمش الاستدعاء ديالو باش يسافر مع صحابو اللاعبين إلى الجديدة استعدادا لمواجهة الدفاع الحسني الجديدي، فانتظار تخاذ فحقو الإجراءات التأديبية.

نفس المصدر، أكد أن سعيد الناصيري رئيس الوداد الرياضي والمكتب المديري، ما غاديش يسمحو بالفوضى تكون داخل الفريق خاصة وأن الواك كيتعتبر نموذج ديال الفريق ومحترم واللي كتضرب به المثل وطنيا وعربيا وإفريقيا، واللاعبين اللي دازو فالوداد كيتعتبرو من أفضل ما أنجبت كرة القدم المغربية كرويا وأخلاقا، وأن إثارة المشاكل داخل الفريق كيتعتبر مس بالصورة ديال الفريق وهادشي ما غاديش يسمح به لبريزيدون سعيد الناصيري.