كود كازا//

فكل مرة كايبان أن سعيد الناصيري الرئيس الأسبق للوداد الرياضي، والقيادي السابق بحزب الأصالة والمعاصرة، إنسان ذكي وهذا الشي حتى فعز الأزمة اللي كايدوز منها بسبب متابعتو فحالة اعتقال فقضية ما يعرف بملف “اسكوبار الصحرا”.

https://www.facebook.com/share/v/19SyeboiKA/?mibextid=wwXIfr

سعيد الناصيري، اللي كايوقف قدام المحكمة بالدار البيضاء، بكل ثقة باش يدافع على راسو ضد ادعاءات الحاج احمد بنبراهيم الملقب بـ “المالي” وبـ “اسكوبار الصحرا”، واللي كايدعي ان الناصيري نصب عليه فالديور وطوموبيل وبلي عضو فشبكة للتهريب الدولي للمخدرات، كايواصل الدفاع على على راسو وكل مرة كايجيب ادلة وبراهين يدافع عليها على راسو، ويكشف لها كذوب المالي عليه.

ووضح امبارك المسكيني محامي سعيد الناصيري فتصريح لجورنال “گود”، وقال: “سعيد قالهم راني فينما كنت كانقول فالتحقيقات انه عندي شي برطمة كايجي المالي يقولهم راه ديالي وانا نقولهم راه عندي شقة فطنجة وهو يجي يقولهم حتى هي ديالي وانا نقولهم راني غير ضحكت معكم راه ما عندي حتى شقة فطنجة”.

سعيد الناصيري بهذه الطريقة كايزيد يخلي اي متتبع لهذه القضية، يطرح سؤال على حقيقة ادعاءات احمد بنبراهيم ضد سعيد الناصيري وكل الشهود اللي عاطيين شهادات ضد البريزيدون السابق للوداد.