گود كازا//

نفى سعيد الناصيري الرئيس الأسبق للوداد الرياضي والقيادي السابق بالوداد الرياضي، المتابع فقضية ما يعرف بـ “إسكوبار الصحرا”، المزاعم ديال الحاج احمد بنبراهيم الملقب بالمالي، على البريزيدون الودادي الاسبق والقيادي البامي السابق كان مسؤول على العلاقات العامة واللوجستيك فشبكة دولية لتهريب المخدرات، ورد سعيد الناصيري ملي واحهاتو بتصريح المالي، وقال ان الأخير الهدف ديالو بهذا الشي هو المس بالنظام ومؤسسات الدولة الشريفة اللي معروفة دوليا بكفاءاتها، وماشي الهدف هو الناصيري.

وفتصريح له هضر امبارك المسكيني محامي سعيد الناصيري، وعاود لميكرو جورنال “گود”، رد سعيد الناصيري على ادعاءات المالي: وقال: “سعيد الناصيري ملي عرضت عليه المحكمة تصريح للمالي كايدعي فيه انه كان مكلف بالعلاقات العامة واللوجستيك، انتفض وقال هذا الرجل اللي اليوم يصرح بهذا الكلام لا يستهدفني أنا شخصيا وإنما يستهدف امن البلد، العلاقات العامة واللوجستيك بالمعنى اللي قدمو الحاج بنبراهيم هو ان الناصيري هو اللي كان كايتصل بالجيش باش يدوزو له المخدرات وهو اللي كان كايتصل بالدرك باش يدوزو له المخدرات وهو اللي كايتصل بالأمن الوطني باش يدوزو له المخدرات وهو اللي كايتصل بالمخابرات المغربية باش يسكتو ويدوزو له المخدرات وهو اللي كان كايتصل بالاستعلامات العامة باش يدوزو له المخدرات”.

وكمل امبارك المسكيني وضاف سعيد الناصيري قال للمحكمة: “الأجهزة الأمنية ديالنا كبر من الحاج احمد بنبراهيم وأشرف منو، هذا الرجل اليوم لا يستهدفني أنا شخصيا وإنما يستهدف اجهزة الوطن والى صدقناه راه ما كانضربوش فسعيد الناصيري راه كانضربو فهاد الأجهزة الحامية للبلد، واللي كايأكد ان كلامو كل كدوب هو أنني اليوم واقف كانتحداه، راه كنت موضوع تنصت مباشر لـ3 سنين، ومراقبة  هاتفية 7 سنين، يجيبو ليا مكالمة هاتفية واحدة مع رجل درك ولا رجل امن ولا رجل جيش ولا رجل استعلامات ولا رجل مخابرات كانتداكر أنا وياه، وكان المفروض اليوم الى كنت أنا مكلف بهذا الشي يكونو حدايا هاد الناس، اليوم أنا واقف بوحدي ما يؤكد ان الهدف ديال الحاج احمد بنبراهيم ما كانش هو المس بهاد الأشخاص فقط، وإنما كانت عندو اهداف خبيثة ودنيئة وتمس بأمن البلد”.

https://www.facebook.com/share/v/1QGBfyi6Ez/?mibextid=wwXIfr