الرئيسية > آراء > الناصري سبق لحساب وبغى يقولب الوداديين باعتذار غبي. بعد هاد الموسم الكارثي كتب: اعاهدكم على خدمة الوداد واذا لم اوفق ساغادر
24/10/2020 10:00 آراء

الناصري سبق لحساب وبغى يقولب الوداديين باعتذار غبي. بعد هاد الموسم الكارثي كتب: اعاهدكم على خدمة الوداد واذا لم اوفق ساغادر

الناصري سبق لحساب وبغى يقولب الوداديين باعتذار غبي. بعد هاد الموسم الكارثي كتب: اعاهدكم على خدمة الوداد واذا لم اوفق ساغادر

كود كازا ///

سعيد الناصري رئيس الوداد البيضاوي اللي عندو فريق كبير من الصحافيين خدامين معاه فالنوار ومستشارين ليه٬ بغى يمص غضب الوداديين. غير تقصات الوداد بديك الطريقة المذلة البارح فالقاهرة ضد الاهلى فنصف عصبة الابطال الافريقية٬ خرح برسالة سماها “رسالة من الرئيس الى الجماهير وجميع مكونات الوداد البيضاوي”.

الرسالة غبية وصافي. ضعيفة فالمحتوى. ما فيهاش ادنى تحمل للمسؤولية . حتى باش قال ان نادي كبير بحال الوداد ما ربح والو فهاد العام وقدم اعتذار كان اعتذار كلو قوالب “اوجه اعتذاز صريح لجماهير وداد الامة. لاننا لم نكن هذا الموسم في مستوى انتظاراته”.

اعتذار لاش الاعتذار خاص الحساب. فرسالتو هادي زاد “لابد من الاعتراف بارتكاب أخطاء في تدبير شؤون الفريق، لم يكن ممكنا تصحيحها في نهاية الموسم، لأننا كنا إزاء موسم استثنائي بكل المقاييس”.

دابا هو شحال من عام وهو فالوداد. الفرقة فيها غير الناصري لا ادارة مهيكلة ولا منظمة ولا ناطق رسمي لا والو. كلشي كيديرو سعيد الناصري. بحالو بحال سعيد الناصري الممثل اللي كيدير الاخراج والانتاج. يعني كلشي.

واعتاقد انو كيمص غضب الوداديين باش قال غادي يباشر الاجراءات الفعلية بداية الاسبوع المقبل فهيكلة شاملة”. اللي ما دارش هاد الهيكلة هادي شحال من عام يستحيل يديرها فاسبوع.

وباش ما يعلنش الاستقالة كاي رئيس وصل الوداد للحيط بغى يقولب جمهور الوداد باش قال “أعاهدكم على العمل خدمة للوداد وشعاره وجمهوره، قد أصيب وقد أخطىء، وإذا لم أوفق فلن أتردد للحظة في مغادرة كرسي رئاسة هذا النادي العظيم والعودة إلى المدرجات وتشجيع الفريق”.

المشكلة فالوداد هي الناصري. هو بنى فرقة ما فيها حتى واحد الا الناصري. يستحيل يغير افكارو. هدفو فالوداد ما كانش كروي. كان سياسي. هادي كارثة. جاب نتائج فلحظة ولكن ما بناش نادي قوي. خسر البطولة بغباء وخرج من كأس محمد السادس بغباء وفلت عصبة الابطال بهواية كبيرة. دابا حتى يخرج من الباب ما يمكنش. خاص الحساب. يحاسبوه على كلشي.

موضوعات أخرى