سعيد بوناصر – كود //

عبر أفراد من ساكنة المضيق على استنكارها الكبير مما أسموه “استفادة جمعية تابعة لرئيس الجماعة من 200 فرصة شغل فإطار تنزيل برنامج “أوراش” فعمالة إقليم المضيق-الفنيدق”، اللي غايخدم الشباب والمتضررين من جايحة “كوفيد-19″، بكونطرات ديال الخدمة لمدة مؤقتة (ِCDD).

وحسب نشطاء فايسبوكيين، قالو “واش عندكم شي عقل ولا لا ؟ جمعية ما عمرنا شفنا المكتب ديالها و لا سمعنا على الجمع العام ديالها وعاطينها 200 فرصة شغل”.

وزادو أكدو “200 فرصة شغل خصها ناس عندهم تجربة في تسيير مقاولات و عارفين معنى الجودة و قانون مدونة الشغل و المحاسبة، راه كلشي باين مال العام فخطر باقليم المضيق الفنيدق”.

وطالبو هاد “ولاد المدينة” من الجهات المعنية تفتح تحقيق فهاد طريقة التسيير الخاصة بتفعيل برنامج “أوراش” اللي كيتسناوه بزاف ديال الناس باش يستافدو، وكيطالبو بإدماج ساكنة المنطقة وخاصة الشباب والنساء بسوق الشغل، وتتعطالهم الأولوية.

وفاتصال لـ”كَود” بالمسؤول عن التواصل بالمجلس الجماعي للفنيدق، أكد بللي الخبر غير صحيح، وأن الجمعية اللي إستافدات من 200 وظيفة كتتواجد فمدينة “الرينكون” ولا علاقة لأي مستشار بها لا من قريب ولا بعيد.

وزاد المتحدث بللي الفنيدق- المضيق مزال لحدود الساعة ما استافدات حتى جمعية من هاد المناطق، بحتى شي فرصة شغل فإطار برنامج “أوراش”، وبللي المجلس الإقليمي، ومصالح أخرى هما اللي كيسهرو على تفعيل البرنامج، والمجلس الجماعي لا علاقة ليه بهاد الأمور.