الكاتب هشام نوستيك – كود ///

دماغ بنادم فشكل بزاف. كايقدر يجمع كمشة ديال التناقضات. ويتعايش معاها وفرحان. واحد المفكر عندنا فبلادنا السعيدة قدر بسلامتو يجمع بين التفكير والتكفير، بين النور والظلام، بين لكرافاطة واللحية (غير المرئية). السي الدكتور للي ديما كيتحفنا بالعجائب ديالو، طلع لابار فوحدة من تدويناتو الأخيرة. دار رثاء كامل متكامل على الإرهابي المغربي عبد العزيز.

شكون هاد الإرهابي؟ واحد خونا نعم عليه الله وجاتو القرعة دميريكان. فعوض ما يستاغل الفرصة ويبني حياتو ويعاون دارهوم، خدا فيزا لإسرائيل، وصل تم مشا لبار، جبد موس وضرب بيه ربعة ديال الناس، جاو البوليس تيراو فيه قتلوه. تسالى الحلم الأمريكي.

المفكر ديالنا فرحان بالشهيد كيفما سماه حيت موتة ففلسطين خير ألف مرة من موتة عادية. إيوا ا عشيري شنو مازال كاتدير فالمغرب؟ باغي تموت موتة عادية؟ راه كاين promotion دابا موتة vip فإسرائيل تسيفطك ديريكت للجنة.

مفكرنا المغربي فرحان أن أسرة الإرهابي غا تستافد من الشفاعة يوم القيامة عوض التحويلات للي كان ممكن تجي من ولدهم وتعاونهم على الزمان. كايشجع جيل كامل على الإرهاب وهو جالس عاطيها للحزاق ونيتفليكس والتدوينات الإرهابية.

المفكر باغينا نديرو شارع بإسم المجرم، حيت بهاد العمل الإرهابي طلع القيمة ديال المغرب فالعالم.

المفكر الحليق العتيق عندو متلازمة عجيبة وغريبة وصعيبة، باغي يكون جوج حوايج فنفس الوقت، باغي يكون المفكر الكبير الذي لا يشق له غبار ، وباغي يكون أمير جماعة إرهابية عندو كاريزما هاربة.

المفكر للي مية فالمية كتجيه الرعشة وهو كيشوف الجولاني، كيآمن بفكرة أن المفكر القوي أفضل من المفكر الضعيف. ما كرهش أنه يبزز عليك تقتانع بالإسهال الفكري التكفيري للي كايخرج منو، وإلا يقتلك!

قالو الناس لقدام أن الغراب بغا يقلد مشية لحمامة، ما قدرش يقلدها وصدق ناسي مشيتو. الدكتور بغا يقلد المفكرين والشيوخ، ما صدق ليه لا تفكير لا مشيخة.

أمن الدولة خاص يدير مع هاد المنظر الإرهابي عوينة وودينة، ويقرا بين أسطر التدوينة، باش ما ندموش يلا وقعات شي روينة.