گود سبور//

مع اقتراب كأس إفريقيا للمحليين اللي غايشارك فيها المغرب فكينيا وتنزانيا وأوگندا بمنتخب محلي من البطولة الاحترافية مكون من لاعبين ولاد عام 2000 والفوق، فقد طارق السكتيوي خدمات لاعب آخر، وهاذ الشي بعدما خسر لاعبين آخرين بحال الحسين رحيمي ومهدي مباريك اللي مشاو للعين الإمارتي.

ويتعلق الأمر بأمين زحزوح لاعب الجيش الملكي اللي ما غايشاركش مع المنتخب الوطني المغربي المحلي فكاس إفريقيا للمحليين، وخا كان من العناصر اللي معول عليها طارق السكتيوي، حيث قرر اللاعب يمشي يحترف فالبطولة القطرية والانتقال من ليفار إلى فريق الوكرة القطري وغايسافر خلال الساعات المقبلة لإتمام الصفقة، وهذا الشي اللي غايحرم المنتخب المحلي من الخدمات ديالو قبل 12 يوم فقط من انطلاق الشان.

ومطالب طارق السكتيوي باش يلقى حلول لهاد المشاكل والإكراهات اللي كايواجه المنتخب المغربي المحلي، بعدما قررو عدد من العناصر ديالو يمشيو من اندية البطولة الاحترافية ويحتارفور برا المغرب، مع العلم أن اول ماتش ديال المنتخب المغربي المحلي فالشان غايكون يوم 3 غشت المقبل بنيروبي بكينيا ضد من أونگولا ضمن الجولة الاولى من دور المجموعات.