سهام البارودي ـ كود//
دنيا بطمة فنانة كبيرة وصوت ماعمرو غايتعاود، هادي حاجة بديهية، وماكاينش شي واحد غايقوليك العكس! أنا شخصيا من المعجبات بدنيا بطمة وصوت دنيا بطمة كايطربني بزًاف وتبعتها من البدايات ديالها فعرب آيدل !
أنها تكون اليوم فالحبس راه خسارة ليها وخسارة للفن ديالها، دنيا بطمة بالمؤهلات ديالها وبداك الصوت الجبّار كان خاصها تكون دابا كاتحيي المهرجانات وكاتعمر المسارح فالعالم كامل… دنيا بطمة كان خاصها تكون مسينية كونطرا مع روتانا ولا اكبر شركات الإنتاج الفني وخدام معاها سطاف ديال الملحنين وكتاب الكلمات والشعراء وكاتبدع لينا فالأغاني وتكون مسينية كونطرات مع شركات الإشهار وربما وجه إعلامي لشي ماركة وطنية ولا عربية كبيرة كادخل لعاقة صحيحة ولكن للأسف اليوم كاينة فالحبس فجناح النساء كاتناوب معاهم على ضريب الجفاف.
أنا شخصيا كانشوف بلي أكبر سبب لي خلا دنيا تكون اليوم فالحبس هوا القراية! لا دنيا قارية لا لونتوراج ديالها قاري، فحال بزاف ديال المغنيين المغاربة لي جايين من وسط شعبي، كاتلقاه عندو الصوت وعندو المؤهلات ديال النجومية ولكن للأسف الجهل ديالو وديال لونتوراج كايخليه منعدم الطموح! صافي كايبدا يخدم لقايجي، الغرامة ترشرش ترشرش، الفلوس داخلة، يشري كاط كاط وڤيلا ويسيفط واليديه للحج ويدير شي مشروع قهوة ويشري جوج موبلات يكريهم وصافي! مرة مرة كاتسمعو داي المرفودة لمولاي بشعيب باش يعطيه مانوى !
قبل لافير ديال حمزة مون بيبي وقبل ماتشد گاع، الاختيارات الخاطئة ديال دنيا بانو من الأول، من تجوجات بالترك والصراعات مع مراتو الأولى وخرجات أغاني يتيمة وماكانوش عندها اختيارات فنية موفقة فالأول، من تما بان بلي من الخيمة خارجة مايلة وغاطيح غاطيح …
وداكشي لي كان! فالقصة ديال دنيا كان بزاف ديال الظلم ليها أكيد، التنمر لي عانات منو ديك البنت موحال واش عانات منو شي مغنية مغربية، فوسائل التواصل الاجتماعي و من منابر اعلامية افترست دنيا ! ولكن كانعاودو ندورو ندورو ونرجعو للقراية! بنادم ماقاريش وأونتوراج ماقاريش وواليدين ماقارينش وصحاب ماقاريينش آش غاتسنى منهم؟! معلوم غايگيدوك للهاوية !
قدّما كان الفنان قاري وجاي من اونتوراج قاري قدما كاتلقاه حافظ سواريه وعارف شنو كايدير وللمثال وليس الحصر، سميرة بن سعيد، أسماء المنور، عثمان مولين … ماعمرك غاتسمع عليهم شي فضيحة ولا شي شوهة !
وقدما كان الفنان غارق فالجهل قدّما غايخرب لاكاريير ديالو بيديه!
موضوعات أخرى
