الرئيسية > آراء > “الموريش”.. اليمين القومي المغربي كيتصاعد…أحد القياديين فحوار خاص مع “كَود”: ها كيفاش تأسسنا ونظرتنا للاقتصاد وها علاش تمغرابيت وغادين فاتجاه نكونو نواة حزب سياسي
17/04/2021 12:00 آراء

“الموريش”.. اليمين القومي المغربي كيتصاعد…أحد القياديين فحوار خاص مع “كَود”: ها كيفاش تأسسنا ونظرتنا للاقتصاد وها علاش تمغرابيت وغادين فاتجاه نكونو نواة حزب سياسي

“الموريش”.. اليمين القومي المغربي كيتصاعد…أحد القياديين فحوار خاص مع “كَود”: ها كيفاش تأسسنا ونظرتنا للاقتصاد وها علاش تمغرابيت وغادين فاتجاه نكونو نواة حزب سياسي

هشام أعناجي ـ كود الرباط//

في سنة 2017،  ظهر تيار قومي يميني ليبرالي، يدعى “الموريش”، وهو تجمع لأنصار القومية المغربية.

محمد أمين، أحد مؤسسي هذا التيار، منسق مجموعة الوحدة الوطنية (لي هي تجمع ديال أنصار الموريش فالمغرب)، ومؤسس صفحة pulse على الفايسبوك، كشف في حوار مع “كود” خلفيات تأسيس هذا التيار الذي بدأ ينتشر بقوة على مواقع التواصل الاجتماعي.

فهاد الحور، غاتعرفو شنو بغات مجموعة الوحدة الوطنية وأهدافها وكيفاش كتشوف “تامغرابيت”، وشنو تصورها للاقتصاد وكيفاش قرارات حكومية ضرات بالاقتصاد والحرية التجارية، وعلاش هوما ضد الحجر الصحي فرمضان، وكيفاش بغات تولي نواة حزب سياسي. 

يقول أمين، فهاد الحوار :”القومية المغربية كتعني بكل بساطة الدفاع على المغرب كدولة أمة  Nation state و بالتالي هدا كيحطنا مباشرة فصراع مع 3 د التيارات لي كترفض هاد المفهوم : الإسلاميين و فكرة الخلافة الجامعة، البعثيين و فكرة الوطن العربي، و الحركة الثقافية الامازيغية لي فيهم تيارات بزاف، حنا ضد التيار لي كينادي بوحدة شمال افريقيا تحت اسم تامزغا الكبرى”.

واليكم نص الحوار كاملا:

1/ بداية هضرو لينا على الحركة و امتى تأسسات و علاش و شنو بغات؟

الحركة تأسسات بشكل عفوي من طرف شباب حسو بخطر التيار لي كيسمي راسو حداثي ( هو فالحقيقة تيار ما بعد حداثي post-modernist، ماركسي التوجه) فصيف 2017، كان الهدف هو نجمعو الشباب لي عندو توجه يميني بكل اطيافو: محافظين، لبيراليين و قوميين. و نلقاو صيغة تأسيس يمين مغربي.

فلول بدينا كتوجه يعادي اليسار الماركسي، من بعد ولينا كنعاديو كل التوجهات الفكرية لي كترفض فكرة الدولة الوطنية، او كتنادي بتدخل اكبر للحكومة فحياة الناس، و الدفاع على التقاليد و القيم المغربية.

كنا بدينا بكَروب فتحناه للعموم، من بعد قلصناه لعدد صغير ديال الشباب لي تباركلاه كيكتبو مزيان سوا فالاقتصاد او التاريخ او  الفلسفة. هاد الكروب حاليا سميتو : نبض الوحدة المغربية. و درنا سيت من بعد عندو نفس السمية pulsemorocco.org.

هاد الكَروب ما مفتوحش للجميع حاليا، فيه فقط الناس لي كيخدمو بشكل مباشر معنا ككَروبpulse

داكشي علاش من بعد مدة فاش بانو بزاف د الصفحات الوطنية والقومية، قررنا هاد العام نندامجو تحت اسم الوحدة الوطنية مع بزاف من هاد الصفحات لي لقينا فيهم توجه معتدل، و فتحنا الكَروب للعموم سوا لي متافقين سوا لي مختالفين معانا باش صوتنا يوصل كثر.

و الحمد لله را حنا خدامين مزيان بزاف.

2/كيفاش كتشوفو الوطنية؟ وأي وطنية بغيتو؟

الوطنية بالنسبة لينا بكل بساطة هي الدفاع على الثوابت د البلاد و الانتماء حصريا لهاد الأرض لي سميتها المغرب و الدفاع على مصالحها و الولاء المطلق ليها.

3/ اشمن قومية بغيتو؟ امازيغية ام ماذا؟

للأسف من نهار بدينا ف 2017 و باقي كين بزاف المتابعين ما فهموش بالضبط شنو معنيت القومية المغربية لي كندافعو عليها. غنحاول نفسر بتفصيل شوية

أي واحد قرا التاريخ د هاد البلاد، غادي يلقا بلي من ديما كانت متفردة فالاستقلالية ديالها السياسية مقارنة بباقي مناطق شمال افريقيا، سوا أيام الممالك المورية القديمة لي كانت كتقاوم الرومان او كتخضع ليهم ،مرورا بالمرحلة الإمبراطورية بعد الإسلام، حتا ليوم.

ملي كنقولو القومية المغربية كيعني بكل بساطة الدفاع على المغرب كدولة أمة  Nation state و بالتالي هدا كيحطنا مباشرة فصراع مع 3 د التيارات لي كترفض هاد المفهوم : الإسلاميين و فكرة الخلافة الجامعة، البعثيين و فكرة الوطن العربي، و الحركة الثقافية الامازيغية لي فيهم تياراتبزاف حنا ضد التيار لي كينادي بوحدة شمال افريقية تحت اسم تامزغا الكبرى.

حنا، كقوميين مغاربة كنشوفو بلي الهوية د المغرب هي الهوية المغربية لي كتعني الأصل + التاريخ.

ولكن نحددو شوية المصطلحات:

كاين فرق بين الأمّة Nation و القومية Nationalism. الأمّة كيان اقليمي، كيرتبط بيه الفرد كمحل ميلادو، يعني كتكون نتا جزء من الأمة. و هذا كيان متطور على الكيانات لي سبقوه، بداية من الأسرة ، القبيلة ، الدولة-المدينة ..الخ، بسبب البعد الإقليمي ديالو. يعني كيكون عندك شعب مختلف القبائل و العادات و التقاليد، و كيحسو فمرحلة تاريخية بلي كين بزااف ما هو مشترك بيناتهم ، و كيجي سياق تاريخي كيفرض راسو و كيفرض التوحيد  ديالهم كأمة.

القومية، هي مجموعة ديال الإعتقادات حول الأمة. يعني حنا كاملين كنتاميو لأمّة سميتها المغرب هنا كنهضر مور ما حددنا الأمة شنوهي ، ضروري غنختالفو فالمعنى ديالها لي فالغالب كيتوضح فتوجهات سياسية، ولكن غنكونو متافقين كقوميين بلي الأمة هي الهدف الأسمى، و ليها الولاء المطلق .

مشكل واحد ممكن يوقع هنا، هو ملي  تولي كتفرض الأديولوجية القومية سياسيا مجموعة ديال الواجبات نحو الأمة تكون كثّقل بيها الحرية الفردية . و هذا موضوع آخر خصو علاج.و علاج كبيير بزاف.

الهوية، سيرورة تاريخية. ما عمر الهوية كانت نقطة تابثة فالتاريخ. عندها اصل اكيد، و ضروري نفهموه و نرجعو ليه. و لكن فاش كتهضر على هويتك اليوم فنتا كتهضر على شريط تاريخي كاامل. من الأصل حتا اليوم. بلا أي نقصان

اكبر خطأ لفهم الهوية هو تفهمها بشكل مركزي ، بمعنى، تحط واحد الطرفمن بزااف لي كيشكلو الهوية ديال كتفيكسيه فسياق تاريخي واحد قديم وتبقا تفسر الهوية ديالك بدرجة القرب او البعد من هاد الطرف. هادي تخربيقة كبيرة. زائد كين بعض منهوم لي لعبو دور تاريخي فتشكل الهوية و فتاسيس الامم، واخا هو عنصر اجنبي فالاصل: الدين التوحيدي كمثال.

و فالغالب التعبير الواضح على هاد الخطأ هو فاش كيفسرو الهوية بالADN ، او ب شكون باك و مك و جدك لي ساكن هنا هادي 700 عام.

ال ADN كينفع فاش كتواجه مثلا العنصريين العرب لي كيقوليك نتا جاي من اليمن، او شي عنصري افروسونطريست كقوليك نتا جاي من القوقاز خص تخرج من افريقيا ككل…الخ من غير هكا الADN  كيعاونك تحدد البداية د الشريط التاريخي لي هضرت عليه الفوق، ماشي شكون نتا اليوم.نتا اليوم هو تاريخك كلو.

الخطأ الثاني، هو توهم بلي تشكل الهوية،(وبالتالي تحديد طبيعة الأمة، و التوجه القومي) هو شيء مخطط ليه مسبقا. لا، هادشي راه تطوري .ماكينش عقل مركزي كيهندس فالهوية ديالك. كينين شعوب لي حرفيا لي الهوية ديالها تشكلات نتيجة للخرافاتdes mythes fondateurs، و لكن واخا فاهمين بلي خرافات ولكن عارفين بلي ساهمت فتشكيل وعي جمعي اليوم. هنا دويت بصفة عامة

العقلانية ماشي هي تقول :بففف هادشي غير منطقي ما خصناش نآمنو بيه و خص نديرو قطيعة معاه، العقلانية هي تفهم هادشي و تعامل معاه.

داكشي علاش:

كندافعو على على الهوية المغربية كهوية متفردة .تمازيغتو الدارجة لغات وطنية، وخص فاسرع وقت يتم تعميم تدريس تمازيغت فكل ربوع المملكة مادام هي رسمية. اش كيتسناو ؟ ما عرفتش.

و الدارجة كندافعو عليها كلغة وطنية طورات فوق هاد الأرض بتفاعل بين العربية و تمازيغيت و خدات شكلها كلغة بقواعدها ..الخ

و غيجي النهار لي نردوها رسمية حتا هي نشاء الله

فهم اكبر للتاريخ المغربي و تطورو لليوم.

والثراث د المغاربة فكل ربوع المملكة هو ثراث ديالنا كاملين كمغاربة.

داكشي علاش عمرنا قسمنا المغاربة لتقسيمات عنصرية: امازيغي اصلي امازيغي مستعرب عريبوشي …الخ

هدا الحماق، كلنا مغاربة و كلنا كنفتاخرو بالالسن ديالنا و بثقافتنا المغربية لي كتاخد تعبيرات مختلفة و لكن كيجمعهابزاف د المشترك.  و من الحمق يبقا شي حد يتفاضل باصلو على لاخر سوا كنتي اصلك مية فالمية من هاد الأرض، سوا كنتي وااااحد الوقت هادي 6 د القرون جيتي من شيبلاصة خرا، ليوم راك مغربي مادام كندوي معاك كتجاوبني بتمازيغت ولا الدارجة.و حامل للقيم المغربية.

و الأهم من هدا كلو: الولاء لله و الوطن و الملك.

و هدا هو لي كنسميوه، التمغرابيت.

4/ كاينا مظاهر عداء المهاجرين (واخا قليلة) عند بعض الموريين، واش هدا موقف رسمي للحركة؟

الموقف الرسمي للحركة هو: ضد الهجرة الغير قانونية.

المغرب معروف بلي انفتح اقتصاديا و سياسيا بزاف على الغرب الافريقي، وهدا حنا ماشي ضدو بالعكس، مادام فيه مصلحة سياسية و اقتصادية لينا فحنا معاه.

و من العادي بزاف ادا انفتحتي على شي بلاد، را غادي تشوف الناس ديالها عندك.

المشكل فين كيطرا؟

هو  ملي كنحسو بلي هاد الهجرة كتكون بشكل غير طبيعي، فاش كيوليو كيدخلو عندك بزاف د الناس بشكل غير قانوني يعني حراكَ و هدا را حنا ضدو.

و فاش كيولي الاحتفاء بهادشي بخطابات حقا ادا عارضتي هاد الهجرة الغير شرعية راك نتا عنصري.

عمري كنت عنصري، قراو معايا أجانب بزاف، من افريقيا جنوب الصحراو من الشرق الأوسط… و كنا مفاهمين بزاف و كلهم مؤدبين و كيحتارمو المغرب. ولكن هادو را دخلو قانونيا لغرض القراية او الخدمة ..الخ ماشي واحد دخل من الحدود حراك و كيسعا فلي رومبوان ..الخ

هنا كتولي الهجرة ثقل اقتصادي بدل المنفعة المتبادلة.

و كين مشكل اخر هو فاش كنسمع : كلنا افارقة و كيقولوها بمبرر را حنا شعب واحد وكدا

عمري سمعت شي هندي مع كوري مثلا قال كلنا اسيويين.

كل شعب عندو هويتو، و ماشي عيب نعتارفو بالاختلاف و ماشي عيب نتعارفو بيناتنا كشعوب و نفالوريزيو ثقافتنا و نسوقو ليها فالعالم،  ولكن افريقيا را غا  قارة ماشي هوية!!

و الشعار الثاني لي كيضحكني هو: لا اعترف بالحدود الوطنية. ما يمكنش دير حدود عليك كفرد بين ربعة د الحيوط و ترفض الحدود على البلاد!!!

5/ الحركة لحد الان افتراضية، واش كين طموح باش تخرجوها لارض الواقع؟ ولا غتبقاو مجهولين؟

كين هاد الطموح اكيد، و خدامين عليه بزاف  و كنا بصدد الخروج بشي اجتماع بين الأعضاء باش نلقاوشي صيغة نخدمو عليها مع الوقت تولي حركة قانونية، حتا جات كورونا و الاكراهات ديالها.

و حاجة خرا، كنحاولو نكسبو راي عام كبير افتراضيا قبل الخروج للواقع باش نهار تخرج تكون بعدا كتيار معروف شوية عند الناس و عندهم فكرة عامة عليك. الزربة للخروج للواقع شوية مضرة.

و هاد العمل الافتراضي واخا بزافكيحكَرو، ولكن را دار مفعولو فهاد 3 سنين و كثر و خنا خدامين. فاش بدينا كيمين مغربي فصفحة pulse كنا غير حنا، دابا را تباركالاه ولا تيار عارم كبير وخا كين اختلافات بين لي معتدل و بين لي عنصري و اقصائي و لكن ع العموم هدا مزيان.

6/ فكرة القومية المغربية، وتمجيد العرق “الموري” السامي النقي، مامعزولاش على السياق العالمي اللي كيعرف صعود التيارات والأحزاب اليمينية، واش الفكرة جات من بعد صعود الرئيس الأمريكي دونالد ترامب (حيت كاين تأثير امريكي واضح بحال شعار make Morocco great again)، ولا كانت حاضرة من قبل؟

الحركة بدات بشكل محتشم ف 2016، كنا فقط افراد كناقشو فدي كَروب فايسبوك على الخطر د الماركسية و الاشراكية و كان النقاش اقتصادي محض.

مور صعود اليمين الشعبوي كيما كيسيمه الاعلام مع صعود ترامب، استغلينا الفرصة و درنا الصفحة . هو استغلال للسياق لا اقل ولا اكثر.

ترامب واليمين الأوروبي كيبقا مختلف علينا تماما. ممكن نكونو متشاركين فداك التوجه المعادي للماركسية الثقافية، ولكن كقوميين راه القومي فالمغرب را كينادي بحوايج مختلفة على القومي فاسبانيا او فرنسا… عكس اليسار لي كتلقاه كينادي بنفس الحاجة تماما فكل بلاد. و هدا هو الفرق.

اول مرة كتبت الشعار make morocco great again هو فمقال نشرتو ف فبراير 2018، شرحت فيه معركة واد المخازن و الدلالة ديالها فترسيخ فكرة القومية المغربية، حيت لي تبع تفاصيلها غيلقا المغرب كان كيدافع على الاستقلال ديالو ضد العثمانيين و الاوربيين بجوج. كان استغلال كيف قلت للسياق لي بدا كيفرض راسو و بداو الناس كيوعاو فالعالم كامل بأهمية السيادة الوطنية.

بالمناسبةMake Amercia Great Again هو شعار ديال رونالد ريغان ماشي ترامب. رونالد ريغان معجب بيه بزاف لي تا هو جا فسياق مشابه لي فيه محاربة الشيوعية و الدفاع على مصالح الامة فوق كل اعتبار، و مع بريطانيا فعهد مارغريت تاتشر لي تا هي معجب بيها بزاف. طبعا الفرق بين ريغان و ترامب سياسيا و اقتصاديا فحال السما مع الأرض، وغتلقا عمرنا درنا شي مقال عليه او حتا دوينا عليه فالصفحة أيام الانتخابات، حيت كيبقا سياسي عندو مزايابزاف و نواقص ولكن بعيد على السياق المغربي.

/7علاش اختاريتو  الراية ديال المرينيين؟

الصراحة لي انا عاقل عليه ، هو  فاش بدينا ف صيف 2017، كنا كنواجهو الأفكار الماركسية و العدميين المغاربة لي كيبخسو بلادهم لصالح البراني(خصوصا مقدسي اردوغان) و كنا كناقشو شمن رمز لي نديروه فالميمز، كنت اقترحت الدرابو د المرينيين، حيت الرمز لي فيه (Octagramme) كتعبر على الخصوصية د المغرب، كتلقاها تقريبا فكل دار فالزليح و الكَبص..الخ داكشي علاش الخصوم اليساريين سماونا بالزلاجية ههههههه الشي لي الصراحة كنفتاخر بيه واخا تقال علينا بغرض قدحي.

و غتلقا بزاف د الميمز فديك الوقت كنا خدمنا بهاد الرمز وما حسابش لينا غياخد هاد الشهرة كاملة. جميل!!

8/ بزاف كيقولو عليكم حركة فاشية وشوفينية ويمينية متطرفة ولا هادو بثلاثة، كيفاش كتشوفو راسكم؟ و كيفاش توصفو حراكتم لواحد ما عارف والو؟

كنوصفو راسنا كـ: يمين قومي لبيرالي. تقدر تقول توجهنا كيدخل فاطارNational liberalism بصيغة مغربية.

كيما قلت القومية ديالنا هي الدفاع على المغرب كدولة قومية Nation State ، و ليبراليين حيت كنشوفو حجم الحكومة عندنا كبير بزاف فالجانب الاقتصادي.بزااااااف د العراقيل البيروقراطية قدام أي مستتمر محلي او اجنبي، و الضرائب العالية و الانفاق الحكومي الكبير.

ما كينش شي بلاد طفراتو اقتصاديا بحكومة فحال هكا. داكشي علاش فمقالاتنا الاقتصادية درنا دراسة لبزاف د الدول لي كانو فحالنا و كفس مننا هادي 50 عام، وسبقونا بسباب الانفتاح الاقتصادي و تصغير حجم الحكومة. ( الشيلي سنغافورة كوريا استونيا السويد….. وبزاف)

و الفكر اللبيرالي فيه جوج مدارس: مدرسة انجليزية و مدرسة فرنسية. اللولة كتدافع على الحكومة المحدودة و العادات والتقاليد و  المؤسسات لي كتأسس فاطار النظام العفوي، و الثانية لي طورات و عطاتنا التيارات اليسارية لي معروفة اليوم.

حنا كنتبناو اللولة، فالوقيتة  نتيجة الفرانكوفونية فالمغرب كيتبناو الثانية، عليها بزاف كتجيهم غريبة كيفاش يتلاقا محافظ مع لبيرالي؟

كاين نقط التقاء بزااف كيما كين اختلاف، داكشي علاش صيغة يمين مغربي كيما فكاع العالم كتبدا بالتفاهم على أساس نقط الالتقاء.

شرح هاد جوج مدارس يطول، نقدرونخليوها لفرصة خرا نشاء الله ناخدوها بتفصيل باش ما نطولش كثر.

9/ مؤخرا درتو معارضة شديدة لقرار الحكومة ديال فرض حظر التجوال الليلي فرمضان، شنوالمبررات  لهاد الموقف؟

مبرر اقتصادي محض. ساندنا بكل قوة و غيرة وطنية أيام الحجر الأول العام لي فات. حيت كنا فخطورة كبيرة و حنا مازال ماعارفينشالفروسشنو ممكن يدير و فالوقيتة لي تخلعنا فاش شفنا دول انهارت تماما فنظامها الصحي.

المغرب ضروري كان خصو يدير الحجر التام استنادا لضعف المنظومة الصحية ديالو لي ما غتحملش انتشار واسع للفيروس.

و لكن من بعد عام، و فوقت لي بدا التلقيح ما كنشوفوش باقي شي مبرر لحجر تاني ولو ففترة صغيرة فالنهار.

حنا عارفين الخطورة د الفيروس و خايفين على راسنا وولادنا و عائلتنا و لكن الاقتصاد المغربي ما بقاش يقدر يتحمل كثر، خصوصا ملي الحكومة ما رحماتش أصحاب المشاريع من الضرائب فالسنة لي فاتت،كنعرف شخصيا صاحب مقهى باقي ما بداش يخدم و جاتو ضريبة ثقيلة. ما كنش ادنى تخفيف حكومي من الثقل الضريبي على الناس واخا المدخول قلال بزاف.

زيد عليها الإجراءات الحمائية لي بداتها الحكومة برفع التعاريف الجمركية على السلع و المواد الأولية المستوردة زادت كفسات الأمور كثر.

ما شي من الحكمة تقول للناس خصكم تحبسو الخدمة بمبرر صحي و فنفس الوقت تزيد تخنق الاقتصاد بالعراقيل الضريبية.

رمضان اغلب المقاهي و المطاعم …الخ كيخدمو غير بليل، كان على الأقل يكتفيو ب منع التنقل بين المدن بشكل كلي واخا فيه ضرر تاهو،ولكن اخف، و يخليو الناس ترزق الله.

صبرنا عام ما يمكنشنصبرو عام اخر.

و طبعا الغرامات على الكمامات و باقي الإجراءات الاحترازية ضروري منها.

10/ شنو هوما الأعداء الاديولوجيين ليكم فالساحة، و شناهي التيارات لي تاتبان ليكم ممكن تحالفومعاها سياسيا و فكريا؟

الأعداءالاديولوجيين كيما شرحت هوما التيارات لي كترفض فكرة المغرب كدولة قومية، او اقتصاديا و سياسيا مع الحكومة الضخمة و التدخلية فالاقتصاد.

للأسف حاليا ما كينش أي تيار او حزب ممكن نتحالفو معاه، كتقرا غير فالبرامج الاقتصادية ديالهم كتلقا التشابه فكولشي تقريبا.

كنطمحو نشاء الله نكونو حنا نواة لحزب مغربي.

11/كيفاش تاتشوفو الاقتصاد المغربي؟ واش غادي ف طريق مزيان ولا عندكم شي مطالب خاص الدولة ديرها؟

حنا كانشوفو ابلي الاقتصاد المغربي مازال كايعاني من بزاف د المشاكل الجذرية لي كايخلي اي محاولات اصلاحية كدار كاتبقا فقط محاولات ترقيعية وماعندهاش تأثير كبير على المجتمع. المغرب منذ سنوات كثيرة وهو كايعرف نمو اقتصادي منخفض جدا بالنسبة للبلد في طور النمو ولي خاص يكون ما بين 7 و8 في المئة سنويا باش يمكن نقولو بلي المغرب في طريق مزيان اقتصاديا.

المغرب كايتميز بنظام رأسمالية المحاسيب لي يمكن نوصفوه بطريقة مختصرة على أنه نظام كايكون فيه النجاح في الأعمال التجارية كايعتامد على العلاقات القوية بين القائمين على العمل التجاري والمسئولين الحكوميين بواحد الشكل من المحاباة فيما يتعلق بشكون خدام ف السوق وهاد المشكل كاينتج لينا احتكار للسوق وأكبر المتضرر منه هو المواطن المغربي.

كما أنه كاين أيضا تدخل قوي للدولة في توجيه الشئون الاقتصادية في المغربوهادشي راجع للثقافة الاقتصادية الفرانكوفونية والكينزية لي منشرة بزاف في المغرب ف أوساط الأكاديميين والاقتصاديين المغاربة ولي خالقا مشكل كبير بالنسبة لينا. اليوم المغرب مازالكايتمركز ف مراتب متأخرة في تصنيف الحرية الاقتصادية لي كانعتابروه أهم المؤشرات الاقتصادية لي كاتوضح الرؤية ديالنا الاقتصادية د اش خاص يتم تغييره وتنفيذه من أجل تحسين المناخ الاقتصادي المغربي.

يعني بخلاصة نحن ننادي بخفض حجم الحكومة في الشأن الاقتصادي والمزيد من الحرية الاقتصادية في البلاد.

هاد الحرية الاقتصادية لي كاندعو ليها كاايتم تصنيفهاف أربع فئات عريضة، و لي كايتم قياستها من خلال 12 مؤشرات:

o سيادة القانون(حقوق الملكية / الفعالية القضائية / نزاهة الحكومة)؛

o حجم الحكومة(العبء الضريبي / الإنفاق الحكومي / الصحة المالية)؛

o الكفاءة التنظيمية (حرية الأعمال / حرية العمل / الحرية النقدية)؛

o انفتاح السوق (حرية التجارة / حرية الاستثمار / الحرية المالية).

وهادشي دوينا عليه بالتفصيل الممل في عدة مقالات في الصفحة والموقع الرسمي ديالنا. هادشي ماكايعنيش اننا كانقولو أن المغرب ماغاديش ف طريق مزيان بل بالعكس المغرب في فترة الملك محمد السادس عرف اصلاحات اقتصادية مهمة وانفتاح اقتصادي مهم مقارنة بالدول المجاورة لينا ولكن خاص المزيد والمزيد من الاصلاحات المؤسساتية والجذرية الكبيرة الا بغينا نسميو راسنا فعلا أننا في الطريق الصحيح.

12/ كنتو ضد مراجعة اتفاقيات التبادل الحر؟ علاش؟ واش ماشي الاقتصاد المغربي متضرر منها؟ 

كيفما قلنا قبل حنا ننادي بالحرية الاقتصادية وعدم تدخل الحكومة في الاقتصاد. ومن بين أهم الركائز د الحرية الاقتصادية هي الحرية التجارية والانفتاح الخارجي. في السنوات الأخيرة في المغرب خرجو بعض الأصوات لي كاتنادي بالحمائية وتشيطن التجارة الحرة وهاد الناس هم فقط اشخاص لي وحدين من الطبقة من رجال الأعمال الريعيين لي كايستافدو أكثر من رأسمالية المحاسيب وقربهم من الدولة ولديهم خوف كبير من المنافسة الخارجية لأنهم يعلمون جيدا أنها ستظهر حقيقة أنهم ماعندهم الكفاءة الكافية باش يواجهوا هاد المنافسة بطريقة عادلة لهذا كايمشيو يقلبو على اسهل طريقة من أجل منع المنافسة ولي هي عن طريق استغلال سلطة الحكومة باش يحطو عراقيل أمام المنافسة الخارجية.

هادشي فايت ذكرو جلالة الملك محمد السادس في خطاب سابق وقال بصريح العبارة أن:”الذين يرفضون إنفتاح بعض القطاعات, بدعوى أن ذلك يتسبب في فقدان مناصب الشغل, فإنهم لا يفكرون في المغاربة … وإنما يخافون على مصالحهم الشخصية.”

هاد الناس لي ضد التجارة الحرة وكايداعيو ان المغرب متضرر من التجارة الخارجية عندهم رؤية جد خاطئة على كيفاش الاقتصاد يعمل وعلى كيفاش التجارة تتم بين الأفراد في مختلف الدول, التعليم الاقتصادي في المغرب كايساهم في هاد الطريقة التفكير ديال ان التجارة هي فيها خاسر ورابح ولكن الاقتصاد كايقول لينا العكس والواقع يظهر لنا العكس بأن التجارة هي عملية كاتميز برابح رابح وعندنا عدة دول لي كانت من الدول الفقيرة في العالم أكثر فقرا منا في الستينات والسبعينات وحتى في التسعينات واليوم هي من احد أكثر الدول متقدمة بسبب السوق الحر والتجارة الحرة.

موضوعات أخرى