كود الرباط//

بعد غدا الأربعاء 15 مايو، غا تنتهي الآجال لتقديم الترشيحات للانتخابات التشريعية الجزئية بإقليم بنسليمان لملء المقعد الشاغر للي كان كيشغلو محمد كريمين، عن حزب الاستقلال، الموجود فعكاشة رهن الاعتقال الاحتياطي.

هاد الانتخابات الجزئية غا تجرى يوم 3 يونيو المقبل، بعدما قضات المحكمة الدستورية بتجريد الرئيس السابق للمجلس الجماعي لبوزنيقة كريمين من المقعد النيابي للي كان كيشغلو باسم حزب الاستقلال.

لكن، لحد الآن، بوحدو البام للي قدم تزكية الترشيح لهاد الانتخابات فشخص أحمد الداهي، وللي جا للبام من حزب الاستقلال. وهادي هي الطامة الكبرى.

كيفاش أن البام للي صادق نهار السبت للي فات على ميثاق الأخلاقيات وكيطلب على لسان منسقة القيادة الثلاثية فاطمة الزهراء المنصوري من الأحزاب باش توضع ميثاق للحد من الترحال السياسي لتخليق الحياة الحزبية، واليوم ها هو نفس الحزب، كيرشح واحد جاي من حزب حليف في الأغلبية الحكومية، باش يدي مقعد نيابي هو أصلا ديال حزب الاستقلال.

مصادر فحزب الاستقلال كتستغرب من هاد التصرف ديال قيادة البام وكتعتابر بللي هاد الشي غادي يكون عندو تأثير سلبي فالعلاقات بين الحزبين: البام والاستقلال.

نفس المصادر قالت بللي راه ممكن فالساعات القادمة يقدم حزب الاستقلال، بتنسيق مع التجمع الوطني للأحرار، مرشح لمنافسة البام فهاد الانتخابات التشريعية الجزئية لاسترجاع مقعده.

وإلى تدارت هادي، فراه ممكن تكون بداية ارتباك وسط الأغلبية الحكومية للي كتواجه حاليا معركة كبيرة كتعلق بوضع مدونة السلوك والأخلاقيات فالبرلمان وأيضا داخل الأحزاب السياسية وفيما بينها.

اليوم فالصباح بكري، جرات اتصالات بين القيادات الحزبية في الأغلبية الحكومية باش تشوف كيفاش تخرج من هاد المأزق، لكن نفس المصادر قالت بللي حزب الاستقلال غاضب بزاف وما بغاتش تصرط ليه هاد القضية وكيفكر يعرضها على لجنة التنسيق ديال الأغلبية.

الطرح بدا يسخن، وسنعود للموضوع مللي تتوفر معطيات جديدة..