الرئيسية > كود سبور > المنخرط الرجاوي الرزاعي لـ”كود”: تسيير الرجا اليوم هاوي و قرار المكتب ضدي ماشي شرعي
19/08/2022 09:00 كود سبور

المنخرط الرجاوي الرزاعي لـ”كود”: تسيير الرجا اليوم هاوي و قرار المكتب ضدي ماشي شرعي

المنخرط الرجاوي الرزاعي لـ”كود”: تسيير الرجا اليوم هاوي و قرار المكتب ضدي ماشي شرعي

كود سبور//

عبر المنخرط الرجاوي حسن الرزاعي على عدم تقبله للقرار اللي صدر فحقو من طرف المكتب المديري ديال الرجاء الرياضي، ولي تعلن البارح الأربعاء،  بإحالتو على اللجنة التأديبية ديال النادي بسبب تصريح صادر عليه.

حسن الرزاعي اعترف  فتصريح أدلى به لموقع “كود” بأن التسجيل الصوتي ديال الواتساب لمسرب من “كروب المنخرطين” فالتطبيق المذكور ديالو، وقال: “الأوديو ديالي والكذوب على الله حرام، ولكن مكانش خاصو يخرج، وماكانش يتم الإعلان على الاستدعاء ديالي أمام اللجنة التأديبية بشكل علني حتى ولو كنت غالط”.

وكشف حسن الرزاعي أن المكتب المديري الحالي ديال الرجاء كيتخبط فالهواية ديال التسيير، مؤكدا فنفس السياق أنه كان من المفروض يتم إشعارو بوحدو بالاستدعاء ديالو للمثول أمام اللجنة التأديبية ديال النادي، بحكم أن المشكل داخلي وكيهم الداخل ديال البيت الرجاوي، وماشي يخرج للعلن”

جوابا على  سؤال موقع “كود” هل ستمتثل لقرار المكتب المديري ديال الرجاء بعرضك على اللجنة التأديبية للنادي؟.. جاوب الرزاعي وهو كيأكد: “لا ما غاديش نمتثل لهذا القرار وماغديش نحضر أمام لجنة غير شرعية”.

وكيعتبر المنخرط الرجاوي حسن الرزاعي أن المكتب المديري الحالي لي منبثقة منو اللجنة التأديبية غير شرعي فالأصل، لأن اللائحة ديالو لم تتم المصادقة عليها فالجمع العام الماضي لي تنصب فيه الرئيس عزيز البدراوي رئيسا للنادي بدون لائحة، قبل ما يعلن من بعد مرور أسابيع على الأعضاء ديال المكتب المديري لي غيرافقوه فتسيير الرجاء خلال الفترة الرئاسية ديالو.

وبخصوص اللجوء ديالو للقضاء فهاذ الملف، أكد حسن الرزاعي أنه ممكن يلجأ للقضاء ضد المكتب المديري للرجاء فقضية التشهير، حيث كيشوف على أن الذكر ديالو بالإسم فالبلاغ لي نشرو النادي ممكن يخلق ليه مشاكل أو يعرض السلامة ديالو وديال أفراد عائلتو للخطر، ومستعد يلجأ للطرق والمساطر القانونية باش يحمي نفسو ويحمي الأقارب ديالو.

وكان الرجاء الرياضي علن يوم أمس فبلاغ له، على إحالة جوج د المنخرطين رجاويين هما حسن الرزاعي وكمال مكسي على اللجنة التأديبية ديال النادي، لفرض العقوبات المنصوص عليها فالنظام الداخلي الرياضي المعمول به بالنادي، وهادشي حسب البلاغ على خلفية التصريحات اللأخلاقية والمسيئة الصادرة عنهما فحق رئيس الرجاء وأعضاء المكتب المديري وبعض اللاعبين ديال الفريق.

موضوعات أخرى

06/10/2022 21:30

طنجة كتوجد باش تبدا مشروع تحلية الما ديال البحر فمواجهة الخصاص الخطير فالما الصالح للشرب