كود سبور//

خسر المنتخب الوطني المغربي الأولمبي مع منتخب أوكرانيا، اليوم السبت برسم الجولة الثانية من دور مجموعات أولمبياد باريس2024، فماتش كان صعيب بزاف.

وسالا الماتش بين المغرب واوكرانيا بنتيجة 2 لواحد لمصلحة الأوكرانيين، وكان المنتخب الاوكراني هو السباق للتسجيل فالشوط الاول بواسطة ديميترو كريسكيف فالدقيقة 22، وتعذب المنتخب المغربي بزاف وهو كايقلب على هدف التعادل وخصوصا من ليكونطر أطاك ديال الأوكرانيين، قبل ما ينجح سفيان رحيمي وجاب بينالتي وتسبب فطرد لاعب أوكرانيا فلوديمير ساليوك وماركاه فالدقيقة 64، ولكن ما قدروش وراها لاعبين المنتخب المغربي يستغلو النقص العددي ديال الأوكرانيين والفرص اللي جاوهم، وبالمقابل فالمنتخب الاوكراني استغل الفرص القليلة اللي جاتو وماركا الهدف الثاني ديال الرباح فاللحظات الاخيرة بواسطة إيهور كراسنو.

وبهذه النتيجة تخربقت الأمور فالگروب الثاني، حيث المنتخبات بأربعة اللي فيه المغرب وأوكرانيا والأرجنتين والعراق ولات عندهم 3 النقاط، والجولة الأخيرة هي اللي غاتحسم هوية الجوج منتخبات اللي غايتأهلو للدور الثاني من هذه المجموعة، مع العلم ان المغرب غايلعب الماتش الجاي ضد العراق والأرجنتين لاعبين ضد أوكرانيا.