گود سبور//

بدا المنتخب الوطني المغربي المشارك فـ كأس العرب، البطولة مزيان برباح مهم فـ الجولة الأولى من دور المجموعات اليوم الثلاثاء فـ تيران الشيخ خليفة على جزر القمر اللي منتخب ماشي ساهل.

وسالا الماتش بين المنتخب الوطني المغربي ومنتخب جزر القمر بنتيجة 3-1 لمصلحة السبوعا، اللي اكتسحو الشوط الأول مع منتخب جزر القمر بنتيجة 3-0، والأهداف ماركاهم كل من سفيان بوفتيني فـ الدقيقة 5، وطارق تيسودالي فـ الدقيقة 11، وكريم البركاوي فـ الدقيقة 48، وراه كانت النتيجة تكون كبر فـ الشوط الأول.

وكلشي كان كايتسنى المنتخب الوطني المغربي يزيد أهداف أخرى فـ الشوط الثاني، والنتيجة تكون كبيرة، ولكن منتخب جزر القمر تسيف مع بداية الشوط الثاني وخرج كايقلب يقلص الفارق وقدر يماركي هدف فـ الدقيقة 57، وبالمقابل المنتخب المغربي رجع اللور واللاعبين المغاربة دارو لبلوك وبقاو معتمدين على الهجمات المرتدة ولكن ما كانتش خطيرة، وخلاو الكورة لجزر القمر اللي كانو يقدرو يزيدو أهداف أخرى لولا الدفاع المغربي والگول شيهاب، قبل ما يدير طارق السكتيوي تغييرات ودخل سعدان للدفاع وبوگرين للوسط الهجومي وحمد الله القدام، باش يرجع التوازن لخطوط ليكيب ناسيونال، وكانو يقدرو يماركيو ولكن المهاجمين المغاربة غاب عليهم التركيز، أما جزر القمر كانو يقدرو يخطفو شي هدف لولا تألق الگول المغربي شيهاب.

وبهذه النتيجة خدا المنتخب الوطني المغربي أول 3 نقاط من أول ماتش فـ كأس العرب، تصدر بها المجموعة الثانية، في انتظار نتيجة الماتش الثاني عن نفس المجموعة بين السعودية وسلطنة عمان، والماتش الجاي غايلعبو المنتخب المغربي ضد سلطنة عمان برسم الجولة الثانية، وجزر القمر لاعبين ضد السعودية عن نفس الجولة.

منتخب جزر القمر بيّن أنه منتخب ماشي ساهل، خصوصا وأن اللاعبين ديالو كايلعبو بلا ضغط، وراه ماتش اليوم ضد منتخب المغربي المشارك فـ كاس العرب، خاص ياخد منو الناخب الوطني وليد الركراكي مؤشرات وصورة على هذا المنتخب اللي غادي يلعب ضد المنتخب المغربي فـ افتتاح كاس إفريقيا “المغرب2025”.