گود سبور//

غاتواجه المنتخبات الوطنية الأفريقية المشاركة فـ كأس أفريقيا “المغرب2025” ومن بينها المنتخب الوطني المغربي، تحدي كبير وهو الوقت الضيق باش توجد للبطولة اللي باقي لها غير 19 يوم.

وحدد الاتحاد الدولي لكرة القدم، يوم 15 ديسمبر الحالي كموعد للأندية باش تخلي اللاعبين ديالها يمشيو لمنتخباتهم للمشاركة معهم فـ كاس افريقيا “المغرب2025″، اللي غادي تبدا يوم 21 من نفس الشهر، أي أن المنتخبات المعنية بالأمر عندها مدة 6 أيام باش تجمع اللاعبين ديالها كاملين وتوجد لانطلاق البطولة.

هذا المدة الزمنية قصيرة بزاف بالنسبة للمنتخب باش توجد لمسابقة قوية وكبيرة بقيمة كأس إفريقيا، وهذا الشي كايعني أن الاتحاد الإفريقي ملزم باش يلقى حلول لموعد يكون مزيان لإقامة البطولة، باش ما يبقاوش المنتخبات واللاعبين يلقاو عائق مع الأندية ديالهم وسط الموسم، حيث الفرق وخصوصا الأوروبية كاتشوف حتى مصالحها خصوصا وأن اللاعبين الأفارقة اللي كاتسني معهم كاتكون عندهم قيمة تسويقية كبيرة، وبالنسبة لها تطلقهم للمنتخبات ديالهم وسط الموسم راه فيه خسارة، وموعد التحاق اللاعبين الأفارقة للمشاركة مع منتخباتهم فـ كأس إفريقيا ديما خالق مشكل مع بداية كل نسخة من كأس إفريقيا.