كود كازا//

توفات صباح اليوم الأحد 16 غشت 2026، المناضلة الحقوقية ثريا بوعبيد، اللي كانت منسقة برنامج التربية على حقوق الإنسان فـمنظمة العفو الدولية ، فرع المغرب، من بعد مسار طويل داز لأكثر من 25 عام فالدفاع على حقوق الإنسان ونشر ثقافتها.

منظمة العفو الدولية فالمغرب عزات الراحلة، وقالت باللي الحركة الحقوقية المغربية فقدات برحيلها «مناضلة استثنائية» بقات وفية للمبادئ والقضايا الإنسانية اللي آمنت بها، حتى مني مرضات  ما تراجعاتش فالدفاع على ضحايا الانتهاكات وعلى نشر  قيم حقوق الإنسان.

المنظمة أكدات باللي ثريا بوعبيد كانت معروفة بعلاقاتها الإنسانية مع أعضاء المنظمة والشركاء ديالها ومع جميع الناس اللي تعاملات معاهم، وقدمت التعازي لأسرتها.

ثريا بوعبيد التحقت بمنظمة العفو الدولية فالمغرب ف 1997، وبدات خدامة كمنسقة للحملات والتحركات، قبل ما تولي ف 2002 مسؤولة على برنامج التربية والتوعية بحقوق الإنسان، ومن بعد شرفات على إدارة برنامج التربية على حقوق الإنسان وسط فرع المنظمة فالمغرب.

رفاقها فالمنظمة وفاعلون حقوقيون أكدوا أن ثريا بوعبيد خلات بصمة كبيرة فمجال التربية على حقوق الإنسان، وساهمات  فتكوين أجيال من المدافعين والمدافعات على الحقوق والحريات، باش تبقى سيرتها والإرث النضالي ديالها جزء من ذاكرة الحركة الحقوقية المغربية.