كود – الرباط //

المغرب كيشارك بقوة فمعرض “إنوفيشن زيرو” بلندن، واحد من أبرز المعارض فالعالم لي كيهتم بالانتقال الطاقي، واللي كيتنظم يومي 29 و30 أبريل 2025.

لكن الجديد هاد المرة، هو الحضور اللافت للجهات الجنوبية الثلاثة: العيون – الساقية الحمراء، الداخلة – وادي الذهب، وكلميم – واد نون، اللي ممثلين بصفتهم الشرعية فهاد التظاهرة الدولية، وكيروجو لفرص استثمارية كبيرة فالصحراء المغربية.

المشاركة ماشي شكلية، حيث المغرب منظم وشريك رسمي فهاد الحدث، بتعاون مع جمعية جهات المغرب ARM، والهدف واضح: تسويق الأقاليم الجنوبية كمراكز مستقبلية للطاقة المتجددة والاقتصاد الأخضر، وجلب الاستثمارات، خصوصاً من بريطانيا.

المعرض فيه ندوة ولقاءات ثنائية (B2B) تحت شعار: “مستقبل مستدام في أرض الفرص”، واللي غادي تجمع صناع القرار، الخبراء، والمستثمرين، باش يهضرو على المشاريع البيئية والطاقة النظيفة، وحتى كيفاش يمكن يتخدمو يد ف يد مع الفاعلين المحليين فالصحراء.

هاد الحضور كيعكس واحد الحقيقة: الممثلين ديال ساكنة الصحراء حاضرين بقوة، كيدخلو مباشرة فالمعارض الدولية، وكيقدمو تصوراتهم ومشاريعهم للعالم، بعيداً على أي وساطة وفمواجهة أي مناورات من أعداء الوحدة الترابية.

الجهات الثلاثة غادي تعرض مشاريعها فمجالات متعددة: من الطاقة الشمسية والريحية، للبنيات التحتية الخضراء، وللتعاون مع الفاعلين الدوليين.