كود – وكالات//

الممثلة الأمريكية ميغان فوكس ولات الوجه الإعلاني الجديد لدواء أمريكي كيتستعمل لعلاج ضعف الانتصاب، وقررت تدخل للحملة بطريقة جريئة واعتبرت أن هاد الدور جا معاها بشكل طبيعي.

فالإعلان، كتجسد ميغان فوكس شخصية بشرية ديال دواء «رو سباركس»، وكتشرح بطريقة ساخرة كيفاش كيخدم العلاج، وهي كتدير حركات وإيحاءات مثيرة. وكتقول فالإعلان: «سلام، أنا رو سباركس. نقدر نوصل ليك مباشرة. ومتقلقش، التغليف ديالي سري بزاف».

ميغان قالت لمجلة «بيبول» الأمريكية وهي كتضحك: «كنحس بحالي تزاديت لهاد الشي»، وزادت: «ما كاين حتى واحد فالعالم مؤهل أكثر مني لهاد المهمة».

وبحسب الممثلة، الهدف ماشي غير الترويج للدواء، ولكن حتى فتح النقاش على موضوع ضعف الانتصاب اللي مازال عند بزاف ديال الرجال موضوع حساس ومحرج ,وقالت بلي الرجال خاصهم يعرفو أنهم ماشي «فاشلين»، وإن هاد المشكل ما كيعنيش أن شي حاجة غير طبيعية فيهم.

وضافت أن العيالات حتى هما كيتعرضو لضغط كبير بسبب التوقعات المرتبطة بالجسد والمظهر والسن، و الرجال كتكون العلاقة بين الأداء الجنسي والصورة ديال الذات قوية بزاف، وهو الشي اللي كيخلي بعضهم يتفاداو الهضرة على هاد الموضوع.

فالحملة الإعلانية اختارت إذن ميغان فوكس باش تقرب موضوع ضعف الانتصاب من الجمهور بطريقة مختلفة، وتحوّل موضوع غالباً كيتناقش فالسكات والإحراج، لمادة إعلانية فيها السخرية والضحك.