كود: كازا//

مرة أخرى، الممثلة المغربية “عائشة ماهماه” كتخطف الأنظار، ولكن هاد المرة بخبر محزن ومضحك فـ نفس الوقت. الفنانة اللي معروفة بعفويتها وبساطتها، أعلنت فـ تدوينة جديدة على صفحتها فـ “فايسبوك” أنها تصابت بكسر فـ يدها، بعد أيام قليلة من بعد ما كانت ناشرة طلب بسيط كتقول فيه أنها باغا شقة صغيرة تسكن فيها بكرامة.

وكتبت ماهماه بطريقة مرحة رغم الألم:

“استغفر الله العظيم وأتوب إليه… طلبت شقة جاتني تهريسة في يدي ما بقي نطلب… شكرا لكل الأطباء والممرضات في كلينيك مرس السلطان بالبيضاء على كل الاهتمام والرحمة بي… ما أجمل الإنسانية والطيبة”.

هاد التدوينة لقات تفاعل كبير من المتابعين اللي دعاو ليها بالشفاء العاجل، وبالمقابل عبّرو على تعاطفهم الكبير معاها بعد النداء اللي كانت وجهاتو قبل أيام وهي كتطلب يد المساعدة باش تلقى سكن لائق، خصوصا أنها من جيل الرواد اللي عطاو بزاف للفن المغربي ومازالو كيعانيو من التهميش.

رغم الإصابة، بينات عائشة ماهماه مرة أخرى أن روحها قوية ومتفائلة، وأنها كتحاول تواجه الصعوبات بابتسامة وسخرية وخفة الدم، الشي اللي خلا محبيها يزيدو احتراما ليها وتقديرا لمسارها الفني الطويل.

الكل اليوم كيدعي ليها بالسلامة، وبأنها تتشافى وترجع لنا بخير، لأن الفنانة عائشة ماهماه كانت وما زالت من الوجوه المحبوبة بزاف عند المغاربة، بطبيعتها الصادقة