كود كازا//

الممثلة المغربية “عائشة ماهماه” خرجات بنداء مؤثر ومليء بالروح ديالها المرحة، بعدما اعتذرات عن حضور تكريم كان غادي يتدار ليها، بسبب ظروفها الصحية الصعيبة.

في تدوينة صادقة، شكرت “ماهماه” كل الناس اللي فكروا فيها وبغاو يكرموها، وقالت بالحرف: «الشكر الجزيل لكل من أراد تكريمي واعتذر عن عدم حضوري لديكم لأسباب صحية قاهرة…»، قبل ما تضيف بنبرة فيها شوية من الحزن وشوية من الدعابة: «من يحب تكريمي مستقبلا فليكرمني بشقة مشمسة كبيرة في الطابق الأول أقضي فيها بقية عمري».

وأوضحت الفنانة أنها كتعيش فمسكن ما مريحش، وكتعاني مع قلة الشمس وصعوبة الحركة، وقالت: «أنا كنخرج كل يوم نطلب الشمس، وكنلقى صعوبة في المشي… هذا هو التكريم اللي بغيت دابا، ما طلبت حتى حاجة لنفسي فالماضي».

وختمات كلامها بعبارات فيها رضا وتفاؤل رغم المعاناة، وقالت ضاحكة: “ايوا قالو اللي طلبها يطلبها كبيرة… ربنا يكرمكم ويكرم كل من كرمني سابقا… إن كتب الله نموت مشمسة في دار زوينة ..”.

هاد النداء ديال عائشة ماهماه خلا بزاف من الناس يتفاعلو معاها على مواقع التواصل، بين اللي تعاطف معاها واللي طالب الجهات المعنية والمحبين للفن المغربي يديرو التفاتة حقيقية لهاد الفنانة اللي أعطات الكثير للسينما والتلفزة المغربية.

ورغم التعب، عائشة ماهماه باقات بنفس الطاقة الطيبة والابتسامة اللي كيعرفها بها الجمهور، وقالت فختم كلامها: «أنا ديما بخير… شكرا وممتنة لكم سابقا ولاحقا».